不守法又狂炒樓 搞亂當地人生活
早前黃絲掀起一股所謂嘅「移民潮」，個個對移民充滿幻想，以為去到外國就一定可以享受到美好嘅生活。之但係，近期陸續有移咗民嘅黃絲大呻外國生活不如理想，對住屋、工作、當地使費乜都大呻一輪。有啲黃絲更加以為移民大晒，去到外國繼續做刁民，懶理當地法律同秩序之餘，仲將香港嘅炒樓文化帶到英國，實行搞亂當地人生活，真係去到邊都神憎鬼厭。●香港文匯報記者 倪思言
水電都驚唔夠畀 遑論要養3細路
有唔少黃絲KOL都帶動風向叫人移民，好多黃絲耳仔軟兼失去理性，聽人氹兩句就盲舂舂咁話要一齊走，但從來唔考慮清楚自己有無足夠嘅能力，搞到移民後擔心呢樣嗰樣，成日要諗計點樣慳住使。有啲黃絲仲淪落到要喺網上求助，話擔心自己應付唔到英國嘅開支。
好似最近就有不具名者向fb專頁投稿，話自己一個人帶住3個幾歲嘅小朋友，身上資金又唔多，只得1個人出去工作，聽到啲水費、電費都貴到爆，感到「真心驚」，仲問大家：「英國有無邊度物價比較平？」
「廢青de倫敦&蘇格蘭巴士講場」就嬲爆咁回應話：「衰d（啲）講句，既然無錢就咪學人走啦，人地（哋）帶住一百幾十萬輕鬆走。你無錢仲要帶住三個小朋友，慳×極你吾（唔）食d（啲）細路都要食。吾（唔）×明白點解有d（啲）人總係要人地（哋）走難，佢又要學人走，又唔諗下自己咩環境。」「倫敦人妻先生手記」就話：「我真心替佢擔心，帶三個小朋友而擔心嘅竟然係水電費，其實仲有好多費用，黎（嚟）到兩個月搵唔到野（嘢）做坐吃山空，佢嘅小朋友點算？」
歸英派：隔日洗澡 屙幾次先沖
無能力但又要移民嘅又點只佢一個吖！另一位自稱「蕃薯媽」嘅網民就喺fb專頁「英國圍爐取暖」發文分享自己極端嘅慳水方法。佢話去到英國生活，見到水費單真係會令人學識更加慳水，所以自己去完廁所會盡量夾埋兩三次先沖一次水，而沖廁就會用洗完衫同洗完頭嘅水，至於小朋友如果無出街就要隔日沖涼，提倡「節約用水」咁話喎。
有網民就寸道：「沖廁都無錢啊，陰公！」而「膠比劉」仲揶揄佢話：「廁所水都唔敢沖，涼都隔日沖，生活質素真係提升左（咗）！」
雖然黃絲不停分享自己嘅苦況，希望有人可以幫到手，但有唔少黃絲「同路人」就批評佢哋放負，仲話「之前大量移民湧入英國，他們也是身無分文！但是現在咪一樣可以喺英國生活」。有啲人仲話：「唔怕啦，為左（咗）小朋友，點都要走。」黃絲明知無能力移民，但都要死撐過去生活，有咩事都只能怪佢哋自己選擇呢條路咯！
冇料見工冇下文 嫌資方齋有禮貌
移民搵工對黃絲嚟講絕對係一大難事，唔少人英文都唔識，又無技術，去到外國都變成失業流民。最近有黃絲就喺fb大呻自己搵唔到嘢做，同時嬲爆爆咁批評英國人「好假」。
點解？原來係因為人哋對佢太客氣、太有禮貌。
網傳有個黃絲喺通訊軟件Telegram上，分享自己喺英國搵工嘅經歷，佢話自己去到英國某公司見工時，對方態度表現得好有誠意，不停向佢分享公司嘅優點，仲講到好似好想佢加盟。呢位黃絲話自己做咗一個星期Assignment，自認為自己做到晒要求，以為一定得啦。點知過咗一排，佢都收唔到通知，於是就鬧爆英國人好虛偽，仲話：「以我經驗，香港果（嗰）面反而無咁×假，來到英國見過幾單都係咁，發覺呢度似乎係比香港假好×多。」
網民恥笑蠢黃好難服侍
唔少人都認為黃絲嘅諗法真係相當奇怪，fb專頁「港英飛機車大炮」就反問：「唔希望被禮貌對待，咁下次面對面大大力reject佢，咁個心會唔會好過小小（少少）？」「英格蘭中部全職煮婦」就話：「人哋對你客客氣氣又唔鐘（鍾）意，一陣西口西面又傷害你弱小心靈，真係好難服侍。」有網民就話，其實喺香港見工都係咁㗎啦！「Isabella Wong」就話：「其實係佢從來冇做過（嘢）定佢成世打一份工？香港講（請）人都唔見得兜口兜面話請定唔請，返嚟香港打下外國公司（工）先出聲，避（免）得自己丟架。」「Hun Pak」直言：「如（與）其話人假，不如話個市道差，人地（哋）大把選擇，想慢慢揀個最好的，或者其實係自己未夠料。」
黃絲暴露出自己無知，唔了解英國文化之餘，仲要用自己套理論去批評人哋，去到邊都蠻不講理，真係可怕！
日用品都唔識分 申請表又唔識填
唔少黃絲移民到外國後不停出醜，仲成日將自己啲醜事放上網，引嚟各界恥笑。專頁「Save HK（救救香港）」不時將佢哋嘅「笑料」截圖，分享畀大家留言，但有黃絲就似乎感到相當不滿，質疑點解咁多人關心港人移民到英國嘅事。不如佢哋考慮下做少啲瘀事，咁咪無人關注囉。
有個自稱已移民到英國嘅網民，早前喺「英國香港人生活交流區」發放笑料。話說佢影住支印上「shower」嘅沖涼液，然後話自己用嚟洗頭，搞到個頭好淋（立），問大家「有咩英國洗頭水推介下比（畀）本人」。網民「Sto Stephen」立即提醒佢「呢支係沖涼用，唔係洗頭水」，佢就解釋話見支嘢平平哋又幾香所以買嚟用，又稱自己「剛剛到步（埗）唔係太識英文」。
連「Shower」同「Shampoo」咁簡單嘅字都分唔清，仲話要喺英國生活，真係令人相當無奈，有人就建議佢唔識嘅話不如拎部電話出嚟翻譯，好過佢咁樣出醜啦。
有黃絲喺同一專頁發文問，「點解地址果（嗰）欄country無得揀Hong Kong？我唯有揀China，去到Health surcharge變jor（咗）比（畀）CNY（人民幣）。」「Man Man」就笑佢：「陰公豬囉，迫住咁『無骨氣』要填中國、比（畀）人民幣。」黃絲連簡單嘅英文都唔識就學人移民外國生活，唔識填表格之餘，仲搞到買錯基本生活用品，唔知呢啲係咪就係佢哋理想中嘅高質生活呢？
蠢黃帶電槍入境 挑釁關員被遣返
唔少移民去英國嘅黃絲除咗唔明咩叫入鄉隨俗，仲連當地嘅法律、規矩都唔識，擾亂當地嘅秩序，認真失禮！藝人兼「煮食blogger」朱庭萱早前就踢爆咗兩件黃絲嘅醜事，並批評一眾黃絲去到當地大聲夾惡做刁民，搞到「黃毒」入侵英倫，相信黃絲嘅出現已經令到當地居民感到滋擾同不滿。
醜出國際 全部遣返
朱庭萱第一件踢爆嘅事係，有一家12口嘅黃人等待入境時，其中老婆喺排隊時高舉手機，邊轉圈拍片邊叫「香港人加油」等口號，被內政部邊境局人員好言勸阻後仍然唔合作，老公後來幫口高叫「我有人權」，仲「起踭」撞向執法人員。
唔單止咁呀，佢後來更繼續叫囂「We are Hongkonger BNO British」、「At the Queen let us in」，嘗試挑起在場港人情緒，不過現場就無人理會佢囉。最後當地執法人員將全部12人扣查，相關人等更加不獲當局批准VISA 入境，而且即時被扣在禁區遣返回港。
第二件事係繼12黃人家庭被遣返8日後，有一對黃絲情侶入境英國時，竟然俾人喺寄艙行李中被搜出兩把電槍。當關員問佢哋做咩帶電槍入境時，佢哋竟然話因為怕共產黨同香港警察去英國「襲擊」佢哋，所以帶定支電槍傍身喎！最後呢對黃絲情侶被當局禁止5年入境，並且即時遣返香港。
朱庭萱直言，好多黃絲都有「妄想迫害症」，而且仲已經病入膏肓，形容佢哋嘅common sense和智商水平喺幼稚園級數：「黃毒上腦經常選擇性地去相信自己想相信的，難怪一直被人取笑『人黃心盲』。」
不務正業狂炒樓 靠害英倫小市民
部分黃絲近期選擇移民去英國，有啲人更加到當地大肆買入物業收租，似乎要將香港嘅炒樓文化帶到英國。有唔少連登網民都批評一班黃絲嘅「劣根性」，擔心黃絲遲早玩壞人哋個地方，搞到英國會排擠所有亞洲人，隨時影響埋一班在港黃絲。
主要城市樓價炒高一成
路透社近日出咗篇報道，話根據地產中介聲稱，香港人喺英國買入好多住宅同公寓，主要目的都係用嚟出租賺錢。香港人蜂擁到英國買樓收租，直接令到英國主要城市嘅樓價被炒高一成至一成半不等，其中利物浦區同車路士區嘅樓價都至少被炒高咗一成。
對一班「同路人」去炒樓，連登網民「榮恩話知你」直言，去到英國炒樓嘅係「英國蝗蟲」，而「革命小前鋒」就話：「留明（名）睇幾年後英國人、市民上街抗議香港人。」有網民更加恥笑黃絲口中嘅「齊上齊落」，原來係講緊樓價，仲話約定所謂「煲底見」，如今應該改作「Cannery wharf見」。
黃絲其實不嬲都咁自私㗎啦，破壞完香港就走去破壞另一個地方，搞到個個都神憎鬼厭。難怪唔少人都勸佢哋正正經經搵份工做，或者搵其他投資玩，唔好影衰香港人咁話。