●提到未來的音樂方向，Hubert希望令樂迷重新認識自己。香港文匯報訊（記者 梁靜儀）胡鴻鈞（Hubert）日前為新歌《整親》拍攝 MV，新歌以自嘲方式帶出就算飽受網絡欺凌、攻擊，都要堅守初衷的訊息。Hubert指出，受傷只會令人變得更強大。
Hubert自出道以來，網絡上都有很多他的評論，而新歌主題主要是圍繞心靈上的受傷，他坦白說：「其實自己一直都好留意，因為呢個係接觸聽眾最好嘅渠道，可以了解市場需要，同外界接軌，知道大家對自己作品嘅睇法，最緊要係識得分析過濾，當中有好多有建設性嘅提議真係好有幫助。咁多年來，學習咗唔好因為一啲反對嘅聲音，或者別人對自己嘅睇法，而影響自己一直追逐嘅夢想，要繼續堅持自己嘅初衷。」
提到MV造型，Hubert 表示新歌在視覺上會有多些新衝擊新感覺，拍攝前他跟導演開會分享想法，希望MV效果誇張些，所以會有好多CG特效，他說：「《整親》即係受傷，其中一個造型係戴上頸箍傷痕纍纍咁，係暗示當俾人批評時大家都會受到傷害，不過有時整親都未嘗唔係一件好事，休息嘅過程中會有好多領悟，希望帶出一種正能量，受傷只會令人變得更強大，要加油！」
提到未來的音樂方向，Hubert：「今年希望有機會令大家重新認識自己，或者係畀一啲未認識我嘅人去認識『胡鴻鈞』，已經入行10年，感覺上未有一張專輯係記錄自己嘅心路歷程，希望呢個目標可以今年達成，出到一張專輯係自己嘅個人感受同經歷，從而喺呢啲歌入面令大家領悟到一啲力量。」