■有網民對比獨琦現照和舊照，發現梁天琦「抗爭後」變得「肥肥白白」。網上圖片聲稱缺堅實理論基礎要讀書 網民恥笑「唔怕死怕坐監」
搞到香港亂一亂、搶咗大量同一陣營嘅反對派支持者，係咪之後認衰仔就冇事、反對派就會放過你？「本土民主前線」發言人獨琦（梁天琦）繼於前日播出的電視台訪問中自認懦弱後，昨日播出的訪問進一步認自己「好廢」，坦承自己「好多時候都係得個噏字」，所以要去讀書喎。除咗一眾網民鬧爆大話獨琦煽人去死、自己就去讀書之外，「熱普城」中人亦大力追打落水狗，包括立法會選舉時不獲獨琦站台嘅「熱血公民」鄭錦滿就大晒自己面對幾多官司都「頂硬上」，亦有人揶揄曾經話要「置生死於度外」嘅獨琦謂︰「『時代革命家』兼哈佛碩士生梁天琦︰我唔怕死，但我怕坐監。」■記者 甘瑜
《now新聞台》昨日繼續播出獨琦訪問，一開頭特寫獨琦最近最多時間都用嚟同貓玩，梁天琦仲話「見貓好過見人」。其後獨琦就在訪問中sell悲情，稱自己「唔想出街，唔想俾人認得，會疑神疑鬼，會好多陰謀論去諗，精神壓力幾大。」
獨琦又話，今年冇得選立法會選舉，對自己嚟講係「大打擊」。話鋒一轉，佢就將自己幫「青山新症（青年新政）」站台、忘恩負義無理曾幫自己站台嘅「熱普城」嘅舉動，簡單概括為︰「選舉係政治利益嘅分配，難免會有衝突、好多是非，我係好討厭𠵱啲嘢。」
死撐「勇武」未到盡頭
對於自己突然唔勇武，反而走去讀書，佢就咁解釋︰「我覺得自己仲係好廢，好多時候得個噏字，冇真係好堅實嘅理論基礎喺背後，所以先會去讀書。」不過，佢繼續死撐「勇武抗爭」未去到盡頭，相信將來再有大型抗爭行動，「勇武抗爭」仍然係需要嘅，而自己讀書期間，會將政治主張透過研究同寫文去宣揚。
獨琦既然認晒衰仔，「熱普城」當然係「此仇不報，更待何時？」其中「超音鼠」鄭錦滿昨日就喺facebook上寫晒自己嘅「抗爭史」，揶揄唔想坐監嘅獨琦，一嘢抽乾維港水謂︰「兩年前，亞皆老街清場時被捕，孭住法庭保釋同禁足令，釋放當晚即落旺角繼續行動，之後仲去金鐘參與包圍政總，平安夜又返落旺角搞事，結果被捕還柙，獄中過聖誕新年。往後一直有警察及法庭保釋在身，『光復』行動期間，每次都幾乎再被捕，但係都繼續出嚟。『佔領』、『抗爭』、選舉，每樣都鬥生鬥死，而且失敗收場。我心理質素好差，差不多已經搾乾搾淨，體無完膚。我淆底，想過離開，但我仲喺度。」
「國師」狠批敗德敗行港恥
之前已判咗獨琦「死刑」嘅「國師」陳雲當然都要出post，「論梁天琦之敗德敗行」，強調獨琦保薦咗「青症雙邪」游蕙禎同梁頌恆出嚟，之後又撇清關係，係「香港之恥」。
親「熱狗」facebook專頁「仇幼聯」就翻獨琦舊賬，指獨琦今年2月仲話爭取民主要用血汗，自己已置生死於度外，大半年後就話自己怕收監，揶揄︰「香港人一於繼續靠梁天琦『時代革命』，前景一片光明呀。」網民「姜維」絕核表示︰「『時代革命家』兼哈佛碩士生梁天琦︰我唔怕死，但我怕坐監。」