■網上不少人製作unboxing（開箱片段），介紹潮流玩意。網上截圖就如graphic calculator一樣，新奇的電子產品我們都叫gadget。大家買新gadget嘅時候一定有個盒裝住樣電子器材。以前，人人梗係返到屋企就即刻拆爛個盒，拎部嘢出嚟玩吓先啦。不過，今時今日嘅電子器材，尤其是手提電話，愈來愈華麗、有趣並且功能多不勝數，於是造成一個新現象，就係製作「Unboxing片段」。
Unboxing？係咪同打拳有關？當然唔係啦！以往拆開包裝盒英文係叫unpacking，不過自從有人製作一啲自己拆開包裝盒、介紹新產品嘅片段之後，就出現咗unboxing（開箱）呢個字喇。
究竟咩係unboxing片段呢？喺外國，有唔少迷上咗手提電話熱潮嘅人會買市面上最新嘅手提電話，然後喺攝影機前打開包裝，向觀看片段嘅人介紹新機嘅外形手感（look and feel）、硬件質素（hardware specifications）、功能（functionality）、運作流暢度（operating fluency）等等。
有人將unboxing當作職業，開發一個專業網頁，定期發放最新手機介紹片段；有手機開發商甚至會將準備推出市面嘅新產品送畀呢啲專門unbox嘅人或公司，希望佢哋可以評價一下，並就此作出最後修改才推出市場。
Jailbreak不同prison break
Jailbreak又同科技有關。越獄？錯！「逃獄」嘅英文正確係prison break而唔係jailbreak。幾年前明珠台就有一部電視劇叫《Prison Break》（《逃》）。
咁咩係jailbreak呢？相信擁有「i」字開頭產品嘅人都會知，其實jailbreak係指破除「i」產品嘅操作限制，並取得更深入嘅使用權限。
喺jailbreak之前，用家只可以由手機內置嘅Apps store下載程式使用，而手機可以畀用家個人化嘅地方好少，最多只可以更換一下背景圖片；jailbreak之後就唔同喇，你可以完全控制你嘅電話、電子書或者mp3，可以如你所欲個人化，例如改變Apps嘅icon顏色形狀，改變解鎖按鈕嘅樣貌等等，數之不盡，甚至可以免費下載一啲原先要收費嘅Apps。
同unboxing一樣，由於jailbreak嘅資訊日新月異，唔少外國青年都會自製jailbreak教學片段並且上載到YouTube畀人收睇。睇jailbreak片段嘅時候，相信你見過呢個pwned字，佢就係其中一個同jailbreak有關嘅slang language。
Pwned多數係電子遊戲或者電器嘅討論中出現，喺電腦世界嘅意思係「擁有」、「完全控制」或「徹底打敗對手」。Pwned嘅「典故」係出自Warcraft呢隻電子遊戲。
當時，每當玩家俾電腦打敗，遊戲就會顯示He has been owned，意思係玩家俾電腦征服咗。不過，為Warcraft寫程式嘅工程師誤將owned打錯變成pwned，因為p和o字就在keyboard（鍵盤）的左右位置，結果就出現咗喺網上以pwned取代owned嘅現象，例如jailbreak嘅開發者話佢哋完全控制咗蘋果產品：We have pwned Apple!
QWERTY竟是鍵盤名
相信你有時都會係網上見到QWERTY呢個字（讀音：Q-WER-TY），其實唔係有人打錯字。QWERTY係一款鍵盤名，指大部分人都用緊、市面上最常見嗰款鍵盤。點解要叫QWERTY？好簡單，為咗容易分辨唔同鍵盤，於是就以鍵盤按鈕頭6個英文字母命名嗰一款鍵盤，而大部分人都用緊嘅鍵盤頭6個英文字母就係Q、W、E、R、T、Y，因此就叫做QWERTY鍵盤喇！■岑皓軒 騎呢領隊
作者簡介：岑皓軒，畢業於英國Imperial College London，著有親子育兒書《辣媽潮爸哈哈B》及與馬漪楠合著暢銷書《Slang：屎爛英語1&2》等。
隔星期三見報