對於「青症雙邪」之一嘅游蕙禎嚟講，2016年肯定係坐過山車嘅一年：出選立法會，支持度唔高又成日喺傳媒面前出醜，點知畀佢掹到車邊，低票奪得九龍西尾席；諗住可以入立法會播「獨」，但就連頭關都過唔到，宣誓唔跟法例兼粗口辱華，最後被DQ（取消資格）兼爭落數以百萬計的議員薪津同訟費。佢前晚喺facebook度整咗個「禎裝大事回顧」短片，雖然無特別提到自己同梁頌恆一手造成嘅宣誓風波，但就不斷舉例子聲稱特區政府係「黑社會」，不過驟眼睇落起碼有三點同事實不符。雖然講到口都臭埋，但網民都係嗰句：回水先！ ■記者 陳庭佳
游BB喺短片中一味鬧特區政府，由上年年頭數到落年尾。包括旺角暴亂、確認書事件、橫洲風波、人大釋法同西九興建香港故宮文化博物館等，口口聲聲話特區政府「帶頭破壞既有秩序同規則，玩弄法律、玩弄文字，剝削同迫害人民嘅勢力，唔應該稱之為政府，而係黑社會」，仲詆毀香港基本法，話入面一字一句「表面上仍然賦予港人權利，但我哋就見到文字底下日漸狹隘嘅生存空間」。
不過，游BB似乎無做到Fact Check（事實查證），例如佢講去年初有多個學童自殺，「我哋聽唔到教育局局長對學生嘅體恤同鼓勵，只係聽到一句『佢哋無做好人生規劃』。」
但事實係，教育局局長吳克儉由頭到尾都無將兩者扯上關係，只係強調生涯規劃非常重要。又例如佢話機管局「先斬後奏」起第三條跑道，「即日加收機場建設費」，但其實機管局已經預早兩個月同大眾交代。
爭落成身街數，仲有閒情逸致拍片，難怪網民嬲嬲。「Man Cheung」話游BB解決問題能力零蛋，不停重複係人都知嘅問題，「旨在欺騙無知群眾去盲目誤信天馬行空，脫離現實言詞誇大嘅騙徒把戲。」「Pun Chan」就不滿游BB口水多過浪花，「做到啲乜？搵啲傻仔信你？」「Kobe O'Neal」就更加直接：「回咩顧，還咗錢先！」
眼利網民「Michael Wong」更指出：「你部MacBook都係用公帑啲錢買返嚟（㗎）啦！你仲好意思攞吤X嚟做show，扮晒嘢咁！你真係厚顏無恥到極！」「Cloudiey Lee」就問：「好富貴喎，咁大張按摩椅，點呀，用納稅人錢買（㗎）！」
黑廳玩分身似貞子飄移
值得一提嘅係，成段「禎裝大事回顧」短片，條橋好似抄緊上世紀80年代嘅MV（音樂錄像），長頭髮嘅游BB喺同一個場景入面不停移形換影，仲要係喺一個黑麻麻嘅客廳，難免被口痕友質返兩句。「Ian Lui」話成個佈局似電視台啲靈異節目，「Kelvin Cas Son Leung」更加抵死：「以為貞子出現。」
睇嚟係內行人嘅「玷句輝」就覺得，咁樣係為咗減低剪接難度，更曲線話游BB咬字同節奏跟得到大學新聞系啲練習，「Formal（嚴格）得嚟，把聲依然係有啲悶。」