■短片中，長頭髮嘅游BB喺同一個場景入面不停移形換影，有網民覺得場面有啲驚嚇。 fb截圖「青山新症」（「青年新政」）原本話要「眾籌」500萬元打官司，點知游蕙禎喺元旦遊行話調低目標價到160萬元，大家諗住佢哋籌旗變酬賓、三二折都照殺時，原來呢個先係Mission Impossible（不可能的任務）。「青症」前晚深夜喺facebook出post（帖文），為「眾籌」定出期限：1月9日下星期一。以佢哋之前用咗個幾月先籌得51萬元嘅戰績，睇怕都無乜可能做到。
「青症」話之前籌到嗰51萬元「已悉數支付作律師費」，而由於預計終審法院會喺本月上旬處理上訴許可，因此必須喺本月9日限期前籌得終院開庭按金160萬元，叫港人「聚沙成塔」小額捐款，更加製圖列出跑數目標（上圖）：每人捐100元就要16,000人、捐200元就要8,000人、捐500元就要3,200人。佢哋聲稱「明白上訴成本甚鉅，一旦敗訴，處境堪憂」，但放棄上訴「方為不負責任之舉」云云。
想幾日籌百幾萬元，好多網民都覺得無乜可能，「李廣仙」更加突破盲腸：「話時話嘞，籌唔夠160萬（元），上唔到訴，收錢以『青年新症』名義，就算你兩條友破產，都唔使交出嚟，但係你哋就有權，動用捐款，最後筆錢咪落咗你哋個袋囉，兩隻呃錢怪，又白癡唔晒喎，一定有高人教路啦。」 ■記者 陳庭佳