香港文匯報訊（記者 甘瑜）公民黨前立法會議員陳家洛日前唔知咩事「玻璃心」，連特首梁振英（CY）歡迎佢到行政長官辦公室大樓前睇升旗都「嬲嬲豬」，似乎事隔兩日仲未嬲完。據悉，CY日前通過同事邀請陳家洛尋日早上去政府總部睇升旗，陳家洛唔止唔出席，連應都唔應。本報記者昨日又打電話、又傳訊息畀陳家洛想佢講兩句，陳家洛都係唔覆。
陳家洛對五星紅旗到底有何想像？本報去年8月報道，身為浸大副教授的公民黨前立法會議員陳家洛曾在授課期間，對學生稱從政者要有「另類看法」，所有參與政治的人都要有「被感召的赤子之心」、「從政的心理準備」，更聲言自己授課時經常「挑戰」學生，「問他們有無想過有天早上醒來， 五星紅旗升不起，有無想像過歷史重擔要忽然落在他們身上。要想像它（威權政府）倒下來......」
本報記者當時曾致電陳家洛希望他回應事件，但陳家洛沒有回覆。不過，陳家洛被各界狠批其言行之後，似乎覺得自己「巧威威」，一個月後再於《明報》撰文，並以《香港自由保衛戰2017》為題，劈頭就說︰「試想像某天一覺醒來，那象徵着中國共產政權的五星紅旗升不起來了，這個政權真的倒了。領導人和數以千萬計的中國共產黨員終於肯講真話承認共產主義是一個世紀騙局......」顛覆國家意圖明顯。
他更提出「問題」，着讀者思考從東歐和蘇聯共產政權解體的經歷和抉擇可以得到什麼「啟發」，又聲言「提倡一些完全顛覆現有秩序的選項，實在對當權者起着監察效果」云云。
網上影片踢爆老屈特首
日前，陳家洛到行政長官辦公室大樓門外示威，CY接信之餘醒起陳家洛對升國旗特別多「想像」，遂邀請佢嚟睇升旗。據短片所見，CY同陳家洛講兩句嘢後，陳家洛就即時黑面，仲睥住CY，CY則笑笑口指咗指國旗。
陳家洛事後聲稱，CY一見到佢就「火山爆發咁」，同佢講：「呢個係升五星紅旗嘅地方，你今日出嚟呢度做乜嘢？」然後就對住媒體大鬧CY「左毒上腦」、「淨係搞鬥爭」云云。
陳家洛畀CY一句「歡迎睇升旗」激到彈起，佢啲支持者一樣情緒咁激動，喺陳家洛fb啲留言都係充滿玻璃碎，一時鬧CY精神病、一時鬧CY唔畀人請願、欺壓百姓，甚至連鬧CY「出賣靈魂給撒但（旦）」都有，亂鬧程度同陳家洛不遑多讓。
其實陳家洛成日「想像」「五星紅旗升不起」，CY請佢去政總度睇清現實，都幾合理啊，點解咁都唔接受呢？唔少市民真係搲爆頭都唔知佢哋嬲乜。
好多人都反問，點解同陳家洛講「五星旗每天升起」會係一種「挑釁」呢？亦都有人批評陳家洛「一句說話都包容唔到，又用傳媒去吹水，無能到極點！」另外仲有唔少市民都指出，陳家洛等人自己挑釁人哋、唔尊重國旗在先，認為CY邀請佢睇升旗係做得好。
據悉，CY亦都有落實邀請，搵同事邀請陳家洛尋日早上去政府總部睇升旗，但當日已經黑口黑面嘅陳家洛，最後冇出席之餘，亦都唔回覆。
本報記者噚日都有打畀陳家洛想知個究竟，但陳家洛冇聽電話，發訊息畀佢亦都係「藍剔」（已讀不回），到而家升旗禮到底有咩可以令佢咁嬲呢？就真係只有陳家洛先知啦。