■湯家驊在fb發帖寸爆許智峯。 fb截圖起升降機方便殘障人士出行，咁都要俾人鬧使用率低？民主黨立法會議員許智峯噚日喺facebook上貼出一段自己嘅訪問，批評政府起升降機，「起完無人用，使用率咁低，咁起黎（嚟）做咩呢？」「民主思路」召集人湯家驊睇到個訪問都頂佢唔順，喺自己facebook上出文寸佢︰「現任民主黨議員許智峰（峯）可能不知道這些升降機是『泛民』、特別是他的前黨主席劉慧卿多年來爭取的成果。這些升降機主要不是便利市民，而是建立無障礙通道便利行動不便的殘障人士。也許許議員應問問這些升降機的來由才批評可能會公道一點。」
兩人的fb帖文可謂高下立見，許智峯篇嘢出咗3個鐘有多，網民click like定畀嬲加埋都唔過40，湯家驊篇文個零鐘已經有近270個like同哈哈笑等。
湯家驊寸不熟書 網民like
唔少網民都留言寸爆許智峯。「Andy Wong」就話︰「湯大狀，果（嗰）隻乳鴿毛都未出齊，樣樣事都拎出黎（嚟）批評一番，批下（吓）批下（吓）計（連）契媽都批埋都品（唔）知，真係弱智無極限。」「Wong Chi Yung」亦話︰「黃屍（絲）除左（咗）反對同嘲笑別人，仲識尐（啲）乜？」「Ken Kwok」再加多腳︰「或者叫許議員自己坐輪椅或者推住BB車行吓街，就知啲車立幾有用。」
其實，起升降機係因為特首梁振英（CY）上任後推出「人人暢道通行」計劃，可能許智峯本身以為自己踩吓CY施政就一定冇死，點知咁都瀨嘢，仲俾網民「Fung Chan」神回覆話︰「高官說錯一兩句話對啫住晒，自己硬膠就當道理......」 ■記者 甘瑜