■《策掂2016》傑出政策人大賽終極游說總決賽。劉國權 攝大家可能見得多正反雙方唇槍舌劍嘅辯論比賽，但有無聽過學生要就不同政策提出建議、再去游說政界人士同多方持份者？智庫「為正策士」就連續兩年舉辦同類型比賽，個名仲大玩食字叫「策掂」，有「傾掂佢」同「政策好掂」雙重意思。總決賽喺噚日舉行，多支大專生同中學生隊伍要就土地、體育同青年政策，同台下嘅和富社會企業主席李宗德、青年事務委員會主席劉鳴煒、民政事務局前常秘楊立門同民主黨前主席劉慧卿等不同光譜嘅人「策掂」。
陸瀚民盼學生學多元民主
「為正策士」近排不時出現喺傳媒報道當中，皆因好多成員都會入前政務司司長林鄭月娥嘅競選特首團隊，包括召集人陸瀚民（Benson）、顧問李律仁、劉培榮同麥黃小珍。
Benson噚日提到，近排傳媒形容佢哋係think tank（智庫），但佢更加想組織成為務實嘅「do tank」，而點解可以請到光譜唔同嘅劉慧卿做評判，就因為自己曾經喺「前綫」年代做過佢兼職助理，希望學生學到民主要多元。
之前好多報道都話Benson會喺林太團隊入面做公關工作，但佢話目前會集中喺林太落區同舉辦活動方面嘅工作。
講返場比賽，雖然參賽同學仔都落足嘴頭游說評判團，但都出現唔少蝦碌情況，其中中學組有隊支持郊野公園建屋，但被問到點解唔先開發棕地、唔先同鄉紳商量時，有個女同學竟然問：「乜嘢係鄉紳？」最後嗰隊攞到中學組季軍。 ■記者 朱朗文