■謝霆鋒、韓星鄭容和及衛詩雅，前晚出席電影首映，三位演員聯同嘉賓「撈起」，祝願新一年風生水起！香港文匯報訊（記者 梁靜儀）謝霆鋒、韓星鄭容和及衛詩雅，前晚到銅鑼灣出席電影《決戰食神》慈善首映禮，英皇老闆楊受成、製片人霍汶希、監製文雋及導演葉偉民齊齊現身為影片造勢。現場又播放該片五分鐘絕密片段，同時為了預祝農曆新年，三位演員聯同一眾嘉賓一齊「撈起」，祝願新一年風生水起！
鄭容和出場時，以廣東話向大家打招呼：「大家好，我係鄭容和。」台下粉絲的尖叫聲即此起彼落。霆鋒亦向大家拜早年，並指民以食為天，希望人人有得食。台上霆鋒又餵鄭容和試雞蛋仔、魚蛋等港式小食，鄭容和試食完更以普通話大讚：「非常好吃！」
霆鋒大讚鄭容和是個專業的演員，他第一次認識對方時，在廚房見到他切黃瓜的刀法，就知道他事前有苦練過。鄭容和自爆練習時試過切親手，因為在鏡頭前表現擅於煮食最難。他又表示除了吃過霆鋒整的蘋果批外，還有烤乳豬，如果有一日霆鋒開餐廳，他必定天天去光顧。
受訪時霆鋒被問會否考慮開餐廳？他直言沒有想過：「以我啲性格我會廿四小時目及住啲餸菜，會畀老闆投訴我唔唱歌、唔拍戲，𠵱家反而幾自由，得閒做美食顧問或客席主廚，空間反而大咗，嘗試緊從飲食去結合影視，好似做曲奇、《12道鋒味》做咗三季，加埋呢部電影，『鋒味』品牌開始成熟，想用唔同風格做落去。」
求證再為人父 被謝賢鬧黐線
談到早前有傳其父謝賢將再為人父，霆鋒亦將再度做哥哥，他笑說：「有聽過，好笑囉！我冇問佢，我叫咗阿妹問，佢（指謝賢）送咗兩句粗口畀我！（邊句粗口？）黐X線！（咁風趣？）你係話我風趣定傳嗰個人風趣先？（你當時聽到的反應係點？）咪係佢同我講嗰句一樣。」
鄭容和表示當初接到電影後就開始苦練刀法，練習了四、五個月，但就沒有拜師學藝，只是靠睇廚師視頻學習，原本一直都沒有受傷，但拍到後期就有少少掉以輕心，整傷了手。鄭容和又稱將來搵女友或老婆，對方是否識煮食也沒所謂，他煮給對方食都得。
衛詩雅自爆拍戲期間肥了五磅，她笑說：「戲份係要我扮試食，但好多時演cut 咗機我都簧I入口，有時霆鋒煮嘢食，我就食完先收工。」她謂有向霆鋒請教煮鹽水雞翼的方法：「想煮畀男友食，但男友食完後就散咗，可能自己聽漏咗加多咗少少鹽，我會檢討吓！」