■松哥鬼馬「派心」。電影《二十比十六》改編自葉氏化工發展史兼本片出品人葉志成的發蹟真人真事，是一部獅子山下努力拚搏創業的勵志電影，為對年輕人有所啟發，社會增添正能量，影片全國上映，所有收益將不扣除電影製作成本，全用作慈善用途。
故事講述劉松仁飾演的葉海鵬和妹妹上世紀六十年代末由廣東石龍鎮攀山越嶺，經8小時游過后海灣在流浮山尖鼻咀登岸及後創立「恒昌行」說起，從零開始奮鬥數十年至成功地建立了化工王國。
日前松哥為宣傳影片接受訪問，他表示今次接拍影片是覺得劇本好另類，拍攝前也有跟故事主人翁見面了解角色。戲中逃難一段戲亦是最感動到松哥，他指因為香港早期的年代好刻苦，他們的辛苦才造就了今日的香港，有所謂香港人的精神。
影片講創業，問到松哥又可有想過創業？他不假思索就答：「冇呀，自己唔係嗰個料子。」他指曾試過與朋友夾份做生意，當結束生意時就為了分錢的問題而感到心裡唔舒服，發覺好朋友是不可以合作，容易有磨擦，之後有朋友找他合作開製作公司，他都婉拒了。除了做生意，他認為工作上也不可以跟好朋友合作：「杜琪峯試過想同我簽兩年經理人合約，但我覺得拍戲導演同演員各有諗法，會有磨擦、會失義，（怕被他鬧？）唔係，係怕意見不合，所以一部都唔拍，唔想冇咗個朋友，現在大家關係好好，如果有拗撬就可能疏遠，影響到關係。」
在演藝圈多年，松哥予人的印象比較獨來獨往，甚少跟圈中人埋堆，松哥不諱言做這行埋堆對工作有利無害，但就有個問題令他選擇不埋堆：「我發現埋堆會失去自我，呢個圈演技個個都學到，但個性就學唔到，自己就去衡量邊樣重要，我就選擇要有自我。」
松哥對演戲研究的同時，對編及導皆精通，原來是為了遇到差的劇本時可以有方法補救：「劇本唔好，可以『人包戲』，即係靠演員演技補救，部戲都仲會好睇，但如果劇本、對手、導演各方面都唔好，自己都會唔好，若只靠運氣，自己的演出都唔會穩定，所以當時諗過編、導、演都要識，現在遇到呢個問題就識得去彌補，我以前好彩係『戲包人』。」
導演放心讓他改劇本
曾到台灣拍戲的松哥，當時要一手包辦編、導、演崗位，導演更會叫他改劇本，改完之後更不用過目，可見導演對他的信任。問到現時拍戲可會改劇本？松哥說：「現在啲劇本更加要改，（導演會讓你改劇本？）冇人唔畀我改。」他又曾試過跟一位電影明星合作拍台劇，當時更停廠跟對方排足4小時戲才正式開機拍攝，令他深感當年在訓練班的訓練是好的，當時拍戲的資金有限，演戲之外他在片場甚麼都要做，大家講求合作性，令他不會以明星自居，自我感覺就會縮細。
從影四十多年，松哥演過不少角色，問到他還有甚麼角色想挑戰？他即回答：「冇，我一向都唔恨（不特別熱衷）演戲，通常有戲就開始創作角色，我唔係鍾意表演的人，係一個怕醜的人，冇表演慾，又怕做訪問、影相，所以都好奇怪做咗呢行，創作都唔鍾意做，係好辛苦，都係一個職業，唔係咩叫專業？所以我拍每一部劇都辛苦。」而今次之所以答應做宣傳，他笑言是因為無人做，如有人做他就會退縮，就像以前跟鍾楚紅合作拍電影《碧水寒山奪命金》，也是對方教他應對。
採訪：梁靜儀
場地提供：Hotel Sav 逸．酒店
服裝提供：agnès b.