「熱狗」主席鄭松泰（蟲泰）鬧公眾鬧到毫無底線，假仁假義都講埋畀人知，但沙田區議員麥潤培竟然仲喺風頭火勢之際，擺自己同蟲泰合照放上facebook，仲豪氣話自己「預咗俾人小」。結果當然係火速跪低，再喺fb貼道歉啟事啦。真係早知如此，何必當初。
出道歉啟事順便賣廣告
麥潤培喺道歉啟事度辯稱，自己一開始只睇咗部分資料，之後睇晒所有嘢後，加上有人提醒，「先知道某人在政界中某些行為不合乎公義」，真係講得夠隱晦。佢仲話︰「身為從政人員，但只顧及地區工作，對政治不敏感是絕不能接受。有見及此公開道歉！本人定當繼續扎根地區，為市民盡做。」
不過你道歉唔等於大家會收貨。「無待堂堂主」盧斯達就出post狙擊︰「沙田區議員麥潤培先生跟誰人是不是朋友，其實都是私人東西，只不過有網友質疑，鄭松泰支持和授意他的組織去網絡欺凌異己甚至支持自己的老人，麥的回應竟然是『政治就是咁』，真的挺難理解。我知道地區實力根本不會有事情能夠動搖，只是這種『存在即合理』令人費解，需知道鄭松泰黃洋達這些人是在傷害一些真名真姓的香港市民。」
網民「Fat Tsoi」亦話︰「點解咁多人死，唔見呢個傻×死，當日起陳國強尾注，響『超級區議會（選舉）』最後一刻至飛甩個提名已經費事再講，佢嘅人生究竟仲要痴（黐）幾多人，×幾多次，食×咗屎都仲轉個圈讚自己專注工作，從政人員真係人不臉天下無敵。」
唔知係咪因為太多人唔收貨，麥潤培刪咗張相同道歉啟事，當什麼也沒有發生。咁樣嘅道歉，同蟲泰嘅變臉速度又真係一樣喎，難怪佢哋係朋友啦。 ■香港文匯報記者 甘瑜