■溫皓宗釘自己手臂，仲話唔痛。 fb截圖林子健單嘢其中一個爭議點，就係佢大髀上面嗰21口釘書釘，有人睇見打冷震，有人就話自己製造傷勢其實唔難。有個曾經係「城邦派國師」傻根（陳云根）信眾嘅人，離咗教都仲好似傻根咁癲，竟然走去搵釘書機釘自己手臂同大髀。最離奇嘅係，唔知係咪仲有傻根啲「神功」護體，佢仲話一啲都唔痛！
呢幾日網上流傳緊一條片，就係有個鬼佬俾人喺身上釘咗104口釘書釘，除咗遍佈雙臂，仲有幾口喺塊面同額頭度，但大髀就無嘞。條鬼佬俾人釘嗰陣，更加嗌到鬼殺咁嘈，粗口橫飛！
曾經俾傻根「封」做「大鵬金翅神將」、之後俾佢踢走嘅溫皓宗（Sammy Wan），前日就俾呢條片「啟發」，喺facebook上載咗一幅聲稱係佢自釘手臂嘅相，仲話「其實原來一啲都唔痛」，自己唔係自殘，只係求真咁話。
「無敵神駒」仇思達留言話林子健咁肥，釘大髀可能感覺似做針灸，「如果痛到×街點忍十幾個鐘，仲走去沖埋涼！」溫皓宗覆佢嗰陣，更加上載咗夆死_樹腳釘咗三口釘書釘嘅相：「啱啱試埋大脾（髀），針灸都痛過佢，其實無咩痛。」
雖然溫皓宗喺度話點樣唔痛，但係我哋都要提醒返屋企嘅大人小朋友，千祈唔好學佢呀！ ■香港文匯報記者 陳庭佳