■有居民搜集不同居民鬧爆民主黨的言論。fb截圖民主黨早前就屋邨反圍標「發圍」，一副「為民請命」咁嘅樣，但所謂日久見人心，網上一啲地區群組，近日就有多篇鬧爆民主黨嘅post（帖文），直言該黨嘅立法會議員林卓廷等人「表面上係反圍標，實際上係靠反圍標拉攏各屋苑法團變成自己人」，用咁嘅手段去操控居民。佢哋仲話，近日粉嶺祥華邨業主立案法團開會，民主黨為咗操控選舉結果，不惜一邊叫人唔好授權畀人投票，自己另一邊就猛收授權票，眼見選舉結果好似會對自己不利，就寧願一拍兩散搞到流會，怒斥︰「成班非業主騎劫晒成個業主大會！」唔少人都話，好後悔投咗民主黨喎。 ■香港文匯報記者 甘瑜
話說祥華邨業主立案法團前日開業主周年大會，主要處理兩個問題，一個係同唔同𠵱家嘅管理公司續約，另一個係法團成員換屆選舉，咁屋邨咁業主嘅事，關民主黨咩事呢？偏偏民主黨就摻咗一腳。前日林卓廷同民主黨嘅區議員陳旭明就齊齊棟喺台上，霸住支咪仲順便搞到流會，幾叻。
居民「Alex Cheung」就喺facebook出post開火話︰「點解民主黨可以咁×街，驚輸咗祥華法團就搞流會，成班小學雞......」然後再tag（標籤）埋林卓廷、陳旭明等人要求佢哋解釋。
陳旭明就留言話，係因為會議前「出現十分嚴重的問題導致會議流會」，仲射個波去「佳定管理公司」度，話佢哋冇按法例規定去處理授權票，仲話有人聲稱俾人搶咗投票表格，咁參考大會律師意見後，「唯有宣布（佈）流會」。陳旭明最後仲話，會向佳定管理公司追究責任，佢同林卓廷「一直呼籲業主不要出賣授權書」。
居民質疑借授權票「做文章」
唔知內情嘅人應該見佢咁講就會收貨，但身在其中嘅祥華邨居民點睇？有居民喺fb打千字文，講返事件來龍去脈，話前日大會準備開會時，場內已經有人派民主黨常用嘅綠色單張去就法團成員換屆選舉拉票，「直頭勁過掌心雷，因為佢直頭係A4紙。」之後陳旭明就搞啲咩授權票問題，最終流咗會。
呢位居民就質疑，佢哋攞住授權票問題大做文章，「但在場人數已達標可以開會啦。咁議員就話堅持唔開。......唔明點解為左（咗）少數人聲稱授權票『數目唔啱』，而令其他99.9%人要一齊流會。以前嘅業主大會都一定存在過呢D（啲）問題，結果呢？都係照開。如果真係好似主席同議員講到咁嚴重，點解唔即刻報警？......個人結論：由於有人無把握贏，所以寧願流會。」
唔少居民亦各自出post或留言鬧爆民主黨，同樣話係佢哋怕前日會輸咗個法團成員換屆選舉，所以搞到流會咁話。
「Alex Cheung」就繼續質問陳旭明︰「（有人搶票）點解唔報警呀？ 駛（使）唔駛（使）搵人幫你報呀？」「Nick Lam」亦加入質問︰「呀陳生，聽講你叫街坊唔好畀授權票人，但自己又不斷收授權票，可唔可以解釋下有無呢回事？」但陳旭明就當然冇再回應啦。
網民斥鴿黨「嘥錢嘥時間」
有人踢爆林卓廷等人根本無權出席。「Ivy Tam」亦留言怒爆︰「×街白鴿黨公然玩弄我地（哋）條祥華村（邨），話流會就流會，口講叫人唔好比（畀）授權信人，自己收咁多！你乜議員咁巴閉要係（喺）業主大會講咁多野（嘢），有冇授權比（畀）你講野（嘢）呀，成日搶咪，垃圾主席做埋應聲蟲，流會浪費幾多錢幾多時間啊！你班議員點會理，因為唔係用緊你地（哋）啲錢嘛！」
「Wing Fat Chan 」同樣爆粗鬧爆民主黨︰「好×嬲，祥華邨個業主大會班人不知所謂起哄搞流會。講真，根本自從陳旭明話唔會叫人俾（畀）授權然後私底下係咁叫義工收，係（喺）條邨已經想搵人信佢都難，今日班人可能見到形勢唔對路就搞流會，我本身仲特登請假去，垃圾！根本民主黨宜（𠵱）家就係借反圍標泥（嚟）控制晒條邨搵著（着）數，之前有線講青衣長安邨單工程，民主黨15年有冇去反下自己黨友個地盤？民乜×野（嘢）主，B隊個名話錯佢，根本衰×過A隊！」
「Mandy Chan」就話︰「所以業主立案法團都唔應該有政黨滲入就最好。」