■有傻根支持者到民主牆貼大字報鬧中大學生會一言堂。 「中大校園電台」fb圖片中文大學學生會公然鼓吹「港獨」，前日仲搞論壇話要「堅拒中大政治審查 捍衛學子言論自由」，同樣鼓吹「港獨」嘅「城邦派國師」傻根（陳云根）理應好高興，但竟然掉轉槍頭喺學生會個facebook發炮，其實咪就係因為個論壇冇請佢而請咗妏黈a囉。「熱青城」班人更衝上學生會fb，聲稱發現傻根嘅留言俾人刪咗，於是就火力加倍咁去鬧爆學生會自己帶頭打壓言論自由，一人一句洗版浸死學生會。
不過，有疑似中大學生就反擊話傻根佢哋未食藥，叫佢不如自己開壇問下佢個神點解學生會唔請佢出席論壇喎。
論壇邀對家 黃毓民有份
中大學生會前日喺校園搞論壇去為佢哋鼓吹「港獨」嘅行為請外援支持，嘉賓包括「香港民族黨」發言人周浩輝、「本土民主前線」召集人偉哥仰（黃台仰）、「普羅政治學苑」創辦人黃毓民、「自決派」立法會議員朱凱廸，同盛傳會參選嘅中大學生會前會長張秀賢等。
咁樣嘅陣容，唔使講都知佢哋會一致「捍衛學子言論自由」啦，咁就俾人鬧一言堂啦，但鬧佢哋嘅唔係其他人，而係傻根。傻根以中大校友身份，衝咗上去留言鬧學生會「毫無學術廉恥」，質疑佢哋話要「港獨」係為錢、為議席、為補選搭雞棚咁話。
佢仲狠批︰「論壇的主題是言論自由，言論自由最重要的是評論意見的制衡，這個論壇全部是『港獨』、『自決派』，有什麼言論自由可言？言論制衡不是要什麼人都請，但必須請一兩個意見對立的或不涉及利益的局外人上台。」佢仲鬧爆學生會公然「違背道德」，搞到論壇成個「內部黨派會議」，越鬧越嬲就話埋學生會係「共匪」。
冇幾耐，「熱青城」班人就聲稱發現學生會刪咗傻根嘅留言，於是一班人就大舉上去開鍵盤戰啦。
刪留言引發「青城派」打鍵盤戰
「陳洛生」就話︰「陳雲在這個post留言，但你地（哋）中大學生會竟然刪post？你地（哋）仲夠膽話自己捍衛言論自由？係笑話嚟的嗎？大學生就有光環做乜都得？」
「John Tam」揶揄︰「言論自由喎， 誓死保衛你嘅發言權喎。」「Samuel Lam」亦話︰「學校覺得你地（哋）嘅言論唔啱聽就撕走你地（哋）嘅海報橫額，你地（哋）覺得陳雲嘅言論唔啱聽就刪走佢嘅留言，中大學生會嘅學生學野（嘢）學得咁快手，果然係一表人材（才），社會棟樑。」
其後，「陳洛生」聲稱︰「陳雲個post hide（隱藏）完post又開返。應該係見勢色唔對。估唔到中大學生會咁陰濕！」「Marco Chan」就摷返之前學生會選舉醜聞出嚟講︰「中大學生會現莊『山鳴』只係（前會長）周竪峰用卑鄙手段捧出黎（嚟）嘅下莊。學生報嗰面照使橫手結果被左膠收拾埋，×到敗走（敗走完就返咗myradio）。」
不過，大學生鬧交都唔弱㗎，「Isaac Ho」直言︰「『青山派』就真係意氣用事啦，由敗選到依（𠵱）家日日怨婦上身！接受唔到少票過（工聯會）鄧家彪呀？」
「Ka Hei Li」就寸嘴問︰「老師，又話移民海外『建國』，幾時走？」「Liu Ka Hin Edmond」亦揶揄︰「返去神壇問下你個×神點解冇人邀請你參加論壇，只可以係到（喺度）打飛機好過啦！廢老。」
鬧吓鬧吓，前晚就有傻根信徒謝同學去中大學生會嘅民主牆度貼文鬧學生會，話佢哋「Hide咗陳雲唔洗（使）講，論壇嘉賓一言堂」。
不過，學生會噚日朝早就話，有關字樣已被「不明人士撕去」，又話自己已「盡力保護民主牆上的字樣，可惜最後未能及時阻止」，仲話為此致歉喎。■香港文匯報記者 甘瑜