■林卓廷的文章錯漏百出，被網民鬧爆。 fb截圖借甘地名言鬧政府 網民：「國際調查證港公義超美國」
「人類總要重複同樣的錯誤。」一日有反對派喺度，一日阿寶都唔知要出動幾多次，今次就輪到民主黨立法會議員咖啡廷（林卓廷）嘞。佢近日喺報章撰文指桑罵槐，表面上就話「港獨」分子幾黃幾暴力，實際上就將矛頭指向特區政府，仲擸埋印度聖雄甘地嘅名言嚟用，話特區政府「邪惡」、「殘忍」、「陰險」、「無恥」，「they always fall」咁話，即係想政府倒台啫！唔少網民批評咖啡廷等反對派議員製造無謂嘅恐慌，有人更引用國際性調查證明，香港嘅公義、司法公正連續幾年高過自詡「最公義」嘅美國，「唔喺香港住真係可能俾你誤導，以為香港係地獄，香港人見到你咁寫就俾你笑死！」 ■香港文匯報記者 陳庭佳
香港文匯報早前逐個打畀反對派立法會議員，問佢哋點睇校園播「獨」，不過，唔知點解差唔多全部人都唔覆機，而民主黨嘅一嚿雲（黃碧雲）回應嗰陣，就將「港獨」同言論自由扯埋嚟講，話學術同言論自由對大學嚟講極之重要，外界唔應該任意「闖入」校園施壓，應該留返畀校方調查究竟掛「港獨」橫額同標語犯咗邊條校規咁話。
公民黨黨魁戇橋（楊岳橋）當日無覆我哋，但就喺facebook出帖話校方、政府「高調介入」事件，應該畀學生喺辯論擂台上面互搏，「校方和政府卻以猶如狙擊槍的公權力，在圍繩外向他們開槍--這正是孔子話齋的『不教而殺謂之虐』」喎。之後，一嚿雲同戇橋就俾網民大肆抨擊嘞。
當日同樣無覆機嘅咖啡廷，似乎冇吸收兩人嘅教訓在前，近日喺報章撰文話，有人認為面對「強權暴政」要「以暴易暴」，仲使乜堅守仁義道德，為咗合理化「無底線抗爭」就攞二戰做例子，要不惜犧牲無辜者，放棄人類既有道德標準，佢覺得似是而非喎，仲大仁大義咁講到：「香港社會固然『不公義』，『強權打壓』無疑越來越嚴重，有人甚至感到絕望，但我認為『歪曲』的年代，更要堅守良知，否則連僅有道德力量也蕩然無存，香港還有什麼？」
稱港社會「不公義」 「強權」打壓
唔知係咪無墨水但要塞版位，咖啡廷最後抄咗三段甘地名言，其中一段仲抄埋英文版𠻹，好有呃稿費嘅感覺，而佢抄嗰三段嘢，其中兩段點睇都似係兜個圈鬧特區政府，包括「因為他們邪惡，我們才要正直；因為他們殘忍，我們才要善良；因為他們陰險，我們才要光明；因為他們無恥，我們才要高尚」，同埋「歷史上有很多暴君和兇手，在短期內或許是所向無敵的，但是終究總是會失敗」。
唔少網民都睇唔過眼咖啡廷滿口仁義道德。「劉文」就引用總部設於紐約的全球公義計劃（World Justice Project）嘅調查，話香港嘅公義指數連續幾年高過自詡「最公義」嘅美國，又引用美國智庫卡托研究所（Cato Institute）嘅人類自由指數（Human Freedom Index），指出香港係全球最自由嘅城市，「一個全球最自由嘅城市點打壓？林先生你點睇？」
「港人見到你咁寫就笑死」
佢仲揶揄道：「你話受壓迫，我話最自由，人說人言，所以就要睇客觀數據，香港喺多項國際指數排名真係好到不得了！......『不公義』、『強權打壓』，唔喺香港住真係可能俾你誤導，以為香港係地獄，香港人見到你咁寫就俾你笑死！」
「David Cheng」就話香港搞成咁，係因為有人製造無謂嘅恐慌，令人對某方面仇視，「林先生你永遠因釘書釘（林子健事件）站不上道德高地，所謂『暴君』形象是你哋妖魔化而令自己有唐吉訶德的形象。」「Cecil Tang」直斥咖啡廷厚面皮，偽善學人講道德，簡直可恥！