■神駒鬧「熱狗」與民爭利。 fb截圖「熱狗」聲稱有好多人課金畀佢哋使，不過講到要課返金派小禮物籠絡選民，佢哋條手指罅又點會漏出一個崩吖？四眼（鄭錦滿）日前就向專幫基層細路嘅「文具銀行」攤大手板，問佢哋攞鉛筆、木顏色筆、間尺、筆記簿等等，仲要攞成60打咁多，俾「無敵神駒」仇思達鬧爆與民爭利，而佢班「益友」更加向「文具銀行」報寸，提醒佢哋以後要三思。蟲泰（鄭松泰）幫「熱狗」口嗰陣，竟然攞埋佢同「左膠」啲私怨嚟講，提返自己講電視發牌篇論文俾人投訴，最後辣着埋「左膠」，成件事亂過亂世佳人！ ■香港文匯報記者 陳庭佳
神駒前晚喺facebook上載咗封信，封信係四眼以「熱狗」副主席身份寫畀「文具銀行」創辦人，話「熱狗」一直「維護基層市民及弱勢社群權益」，會搞親子同長者活動，想問「文具銀行」攞25套「立體紙製教學工具」、60打鉛筆、60打木顏色筆、60把間尺同96本A4筆記簿。
神駒鬧「熱狗」正一吸血鬼，收咗咁多課金，又籌咗差唔多兩球搞「熱狗仔隊」，仲要攤大手板問「文具銀行」苛索大量文具，「×你老母鄭錦滿做乜唔問尊貴的鄭松泰議員攞錢買文具呀？立法會無出津貼畀佢咩？與民爭利，正一食屎狗！」
網民鬧「乞兒兜拿飯食」
唔少「益友」都鬧爆「熱狗」 喺「乞兒兜拿飯食」，神駒個傍友「陳興旺」就攞返四眼上年選立法會「唔記得」申報選舉資助呢件事嚟講，「畀咗幾十萬（元）政府（射落政府度），反對任何有機會被『新移民』（新來港人士）享有嘅福利，然後話自己『關懷弱勢』，同真正有需要人士爭文具，笑大人把口。」
「Kevin Yuen」就留意到封信個編號係「001/ckm」，質疑四眼做咗「熱狗」副主席咁耐先寫第一封信。不過，「Timothy Mak」就提醒神駒，話議員唔可以用自己薪津買物資畀市民，唔係就犯法。
曾經去《熱血時報》個聊天室踢館嘅「陳永仁」，前晚就喺fb私訊「文具銀行」斷「熱狗」米路，提醒佢哋「熱狗」其實「本身都有錢」，希望佢哋三思，幫到真正有需要嘅人，而相信係鍾燕齊本人就覆返佢話「受教」，以後會小心處理。
黐開「熱狗」嘅fb專頁「剷爆左膠」，噚日就反擊神駒，摷返佢契爺「狗主」黃毓民做立法會議員嗰陣嘅議員個人利益登記冊，發現狗主都搵過非政府組織贊助長者活動，「仇思達條五毛仲唔開咪譴責！？」「Ronald Lo」就寸神駒又玩回力刀整親自己，「澳洲土著都唔係佢嗰皮。」
蟲泰噚日亦都喺fb開聲，插神駒同班「益友」抹黑造謠、污衊誣陷，不過越嚟越多民間組織鍾意同「熱狗」合作，「因為他們發現，我們才是『正直』地做實事的一群。」
蟲泰乘機翻「左膠」舊賬
但係蟲泰轉頭就撩返另一單私怨嚟講，話自己4年前有篇講電視發牌嘅學術論文，提到「左膠」借呢樣嘢「籌款騙財」，之後佢俾系主任照肺，話有人向學系投訴云云。
當年喺籌款方面非常活躍嘅前民主黨成員區諾軒，就抵唔住頸反駁：「唔好講到自己畀（俾）系主任召見咁無辜喎，正白旗旗主鄭松泰......你指控『行騙』，款項喺律師見證下點算、捐畀人你唔講，原本所有遊行開支，全部自食，你喺學術論文度有冇做文獻回顧呀博士？喺做指控時，畀咗咩證據呀博士？」