■李政熙將「熱狗」黨章掟上fb任人睇。fb截圖「熱血公民」，一直做嘅就係搵錢。有前「熱狗」成員早排突然在網上爆咗「熱狗」嘅黨章，其中好多條文，但其中主要都係一個「錢」字，同埋黨主席幾乎獨攬大權。不少前「熱狗」同反「熱狗」者齊齊揶揄，「熱狗」嘅黨務就係搵錢。點知「熱狗」前「首領」狗達（黃洋達）之妻殘獸慧（陳秀慧）反擊話，自己「冇睇過呢份黨章喎」，當然引來恥笑，話連黨章都未見過，可見呢個「黨」幾咁兒戲。
「狗主」黃毓民此前喺網台節目裡面提及「熱血公民」嘅「垃圾黨章」，被踢出「熱狗」嘅李政熙即刻「做嘢」，喺自己fb網頁上載咗「熱血公民」嘅「黨章」，「為免各位朋友唔知道（黨章）到底有幾『垃圾』，等我放埋出嚟比（畀）大家研究下。」
他更幫口「澄清」：「大家千祈唔好覺得因為而（𠵱）家熱血公民係『垃圾』，呢份嘢就等於垃圾，而係呢份嘢本身就係垃圾，真係要搞清楚，呢樣野（嘢）好重要。」
一言蔽之：用盡方法搵錢
睇咗「熱狗」嘅「黨章」，又的確係「垃圾」，尤其「黨務範圍及原則」一條當屬「奇葩」。該條文明文規定「熱狗」可以「以適當的方式去投資及處理本黨非經常使用的款項」、「借人任何有抵押或沒有抵押的款項」及「接受個人、團體或機構作出的捐款、付款及餽贈」，還能買賣土地或其他不動產云云。可見「熱狗」嘅「黨務」就係搵人捐款、作投資、向人借貸以及賣不動產套現等等，簡單一句就係：用盡各種方法搵錢。
「Tin Fong Chak」道：「未見過一份黨章第三點就係講錢。」「Ho Ho Lun」就「一語中的」：「黨務即課金（畀錢）。」
「Wong Wai Lung」則另有關注：「好好奇（黨章）最後果（嗰）點，即係所有嘢改唔改，點樣改，都係主席一個人話晒事？」「Harry Kwan」則道：「紀律得個幾點，唔怪之得副主席（鄭錦滿）都可以（因『行政問題』）射落海（無申領30萬元立法會選舉津貼）。」
「獸慧」話冇睇過 被嘲「當公眾白癡」
「熱狗」前「首領」狗達（黃洋達）之妻殘獸慧（陳秀慧）其後發帖反擊稱：「份黨章我地（哋）都冇睇過冇接觸過，其實份嘢垃唔垃圾關佢×事？點解咁多唔關事既（嘅）人咁多意見？真係得閒。」「熱狗」司徒小龍也附和道：「咁......（李政熙）無工開又唔駛（使）搵食......係得閒啲嘅！」
李政熙即時cap圖還拖：「臭×！你扮乜×嘢冇睇過呢？你想話俾（畀）人知，你自己作為黨員都冇睇過冇接觸過呢份嘢啊？？你真係同鄭生（『熱狗』副主席鄭錦滿）一×樣咁on ×，當公眾仲係白癡啊？」
他又向司徒小龍開炮：「呀（阿）小龍，無工開但又要搵食，淨係諗住靠份課金養妻活兒，堂堂一名『師父』搞到要好似脫衣舞男（李曾在《熱血時報》直播節目只穿泳褲擺甫士）咁，係辛苦嘅。」
「Neil Law」就附和道：「因為你（『熱狗』）呃幾百九幾萬（指《熱時》聲稱要成立『熱狗仔隊』所籌得的款項）人地（哋）先關注你啲嘢嘛，唔通貪你靚同有智慧咩？」「Aggie Tse」就恥笑道：「連黨章都無睇學咩人指點江山？證明佢地（哋）做野（嘢）向來都××流流。」
本是同根生，相煎何太急。前「熱狗」與現「熱狗」為咗個「垃圾黨章」「狗咬狗骨」，大家都係搬定櫈仔，食花生睇戲啦。 ■香港文匯報記者 鄭治祖