香港文匯報訊（記者 鄭治祖）口講「大團結」，不過係噴吓口水啫，冇成本點解唔講，但一講到有實質利益的選舉，就即刻反晒面。中西區區議會「東華」選區提名期今日開始，「瀆誓四丑」之一的姚松炎，就當傳統反對派嗰個協調機制冇到，撐「中西區關注組」的羅雅寧參選，對撼民主黨嘅伍凱欣。羅雅寧在接受傳媒訪問時就大打「保育牌」。伍凱欣亦唔執輸，潤羅雅寧只識保育，而佢自己就比較全面喎！
羅雅寧近日在接受「香港獨立媒體網」訪問時，話自己喺中西區堅道一帶長大及生活至今逾40年，且自2005年成立「中西區關注組」開始就跟進區內多項保育、綠化、市區重建等議題。
佢又sell話自己「無政治背景」，可以在區議會爭取其他派和建制派就地區議題共同支持，又希望民主黨畀「街坊」一個機會，參與是次補選咁話。
「蟲炎」比鄭家富更無恥
「瀆誓四丑」之一姚松炎就為自己撐羅雅寧、拒絕跟從反對派「協調機制」支持伍凱欣的決定辯護，捉字蝨稱該機制只規限圍內成員出選，但沒有規定成員不可支持機制以外的人。網民「Daniel Chan」就狠批姚松炎：「利用激進派對民主黨既（嘅）不滿，去增加自已政治本錢，姚蟲炎比鄭家富更無恥！」
伍凱欣在接受「獨媒」訪問時反駁，羅雅寧只識保育，自己除了保育議題外更為全面，又強調自己住過上環荷李活道、普慶坊和皇后大道西，而成長階段就喺東華，所以「都係街坊」，又標榜自己是「全職地區工作者」：「居民需要求助時，原來你返緊工？你唔覆我呀？全職與否都好重要。」
過去兩屆區議會選舉，伍凱欣曾先後參選同為中西區的堅摩和水街選區，但均落敗，是次又轉區，被質疑是要「霸住個區」，她稱，民主黨自1986年起已在東華開始社區工作，「唔係咩都唔做然後霸住，而係一直希望贏返。......你（羅雅寧）話你係街坊，其實我都係街坊，只係代表民主黨的街坊，可以支持吓我噃。」