■吳斯翹與葉政淳鬧大交實錄。貴圈真亂！「熱城」大搞清算，講句唔啱聽都即係俾人當「鬼」辦。一直好黐「熱城」、在銅鑼灣購物街針織欄杆一役受到唔少人支持嘅「手作達人」吳斯翹（Billie Ng），就因為「生唔生仔」嘅問題同「葉政淳」葉偉健鬧大交，搞到兩邊罵戰，你block（封鎖）我，我block你，鬥個不亦樂乎。 ■香港文匯報記者 羅旦
有「獨派」中人話要生多啲仔，以免越來越多內地人移居香港，「溝淡港人成分」，同時要留下「鬥爭」的種子云云。
最鍾意搞清算嘅「藍鳳凰」就發帖話：「生仔救港？只係一廂情願嘅妄想。而且今時今日生佢出黎（嚟），即係要佢受罪姐（啫）......」
正當一班人圍爐之際，有個仔嘅Billie Ng就留言話：「咁其實大家唔使咁辛苦，日日鼓勵大家絕子絕孫，三十年後乜問題都冇。」
「葉政淳」回應稱：「生唔生只係大人決定，你有勇氣，我無，講出來唔代表『鼓勵』人絕子絕孫。倒返轉我都唔可能指摘生仔來持續鬥爭的人是『鼓勵』人令下一代受苦吧。」
吳「勉」葉投稿「熔癌」
Billie Ng可能做慣阿姐，一被人窒就受唔住反擊：「呢點你哋同容樂其班人好啱傾，可以投稿腐仁（輔仁媒體），佢一定登。」話說「輔仁媒體」總編輯「熔癌」容樂其同「熱城」一直極為唔妥，阿姐一句即時點着葉政淳：「你咁講乜×嘢意思！」
Billie Ng就陰陽怪氣地回覆：「冇咩意思，果（嗰）邊最憎人生仔。」葉政淳繼續發火：「即係三句唔埋唔啱聽就可以話人投共？咁呀，即係你生咗仔，我唔會話你，但我唔生仔，講點解，就叫我投輔仁，話好夾，得架（㗎）喇你。......你叫我投輔仁，咪即係串（寸）緊我，好×侮辱我喎，係咪當有日你係（喺）部份（分）議題上同民建聯有相同，我就可以話你不如！」
「藍鳳凰」也加把嘴：「你（Billie Ng）知咁叫人投稿輔仁，係好侮辱㗎可？......而且仲話『叫你投稿啫』，come on 咁大個人，咁嘅場合包拗頸唔係諗住可以滅火呀？」葉政淳就火滾道：「一係道歉，一係入來理論，你cap圖係（喺）自己個wall度等人評下你你咁講有無問題。」
葉反咬吳講話離譜
葉續稱：「嬲除咗句嘢本身，我同輔仁容（熔）癌全面反面係因為熱狗立法會頂門事件，往後亦受到輔黨攻擊。另外係我估唔到會有呢種展開，我認為到今日仲留得低嘅，講說話唔會咁離譜，係我自己對所謂同道嘅期望太高。如果，只係如果，我一開始拎佢同曾蔭權放埋一齊，你睇下呢班女人s會唔會有風駛盡，追殺到底。」
「熱狗」「Karen Chiu」也道：「如果葉政淳講點解自己選擇唔生仔就等於同容（熔）癌好夾，咁我有養貓，盧斯達仇思達法國佬嗰班都有養貓，咁我係咪要過去埋堆？講唔通架（㗎）嘛，係咪？......無啦啦話我哋成班認為『唔應該以救港為前提生仔』嘅人會同容癌好夾，咁講法真係過咗火位。當時（事）人應該出黎（嚟）道歉。」
阿姐當然冇道歉啦，有啲「熱城」去阿姐處留言，仲俾佢block埋。
葉政淳就道：「佢口大我口細，佢人多我人少，無成本又可以逞口舌之快，點解唔做？講真素來同佢無乜兩句，無交集，佢唔駛（使）靠我我唔駛（使）靠佢，鬧翻又有乜所謂。......呢單野（嘢）本來閒過立秋，講句sorry我講錯嘢，收返就完。但而（𠵱）家咁樣龜法仲想帶埋返去佢本陣，肯定有手尾，我又得罪多一黨嘅人。好多積怨，就係咁樣無厘×頭地日積月累。」
所以話，「熱城」成班都小家玻璃心，都唔知幾時踩親某個人條尾，俾佢哋當係「自己友」，都真係要喊三聲。