林 作
又到12月尾，街上面隨處都可以見到聖誕燈飾同埋大大小小的聖誕活動，晚上的大型商場以及維港兩岸就會變得非常熱鬧，一家大細或者情侶都會去感受一下冬日聖誕的氣氛同熱鬧。
大家可能會好奇，外國的聖誕，尤其係作為基督教國家嘅英國，聖誕氣氛會不會比香港更重，有更多盛大嘅活動呢？實情係，除了大城市以外，好多地方都係死城。仲記得有一年嘅聖誕我留咗喺牛津，打算閉關讀書，結果差點餓死。點解？絕大部分嘅人都選擇返屋企，99.9%嘅商店都不做生意，連餐廳都唔開門（仲勁過農曆新年），唯一屹立不倒的只有Saintsbury或者Tesco等超級市場。而一直秉持住「君子遠庖廚」理念嘅我又唔太識煮食，結果只能靠乾糧或者即食麵度日，好慘。
不過老實講，如果你問我，聖誕節嗰幾日我都會寧願學下英國人咁，留喺屋企同家人或者朋友安安靜靜咁度過，順便睇埋英超嘅聖誕快車。其實唔止係聖誕，元旦、復活節或者其它大節，我基本上唔會出去參加所謂嘅節日慶典。第一，我真係好討厭去同人逼逼逼。香港地方已經夠細，一去到大時大節，放煙花睇燈飾嘅地方就會變咗萬聖節嘅蘭桂坊，行都行唔郁，環境極度惡劣，完全無氣氛可言。
第二，我一直都唔明白湊熱鬧呢種活動。香港人，總係鍾意流連喺各種唔同嘅活動之中。一有大型節日活動出現，就更加要拉埋三五知己一齊去。個人認為，呢個係一種怕蝕底嘅心態。一年先有一次嘅限時活動，唔去就好似會Miss咗啲重要嘢。加上去完之後又可以同朋友吹噓，邊度邊度的活動好好玩，有咩係唔可以錯過，然後喺朋友羨慕加崇拜嘅目光中滿足咗自己嘅虛榮感。朋友聽完，基於人去我又要去嘅羊群心態，又拉埋兄弟姊妹團一齊去，結果就係香港稍有規模嘅活動都會多人得要命。
以前（被迫）去過唔少香港嘅節日活動，其實都係千篇一律又或者因為地方所限，對比起外國嘅活動時氣氛及內容都大為遜色。假日係應該用嚟好好休息，難得有幾日可以遠離工作好好叉電，點解仲硬要出去同人逼然後仲慘過返工呢？我真係寧願留喺屋企睇書好過。
