■郭永健話要令公共交通唔會變成「牟利工具」。 fb截圖雖然「民主動力」就立法會補選場「初選」喺今個月14號先至投票，但係各路人馬已經開始互爆陰毒。其中喺新界東，工黨主席郭永健呢頭話唔要畀公共交通成為牟利工具，嗰頭即刻俾自居「時事評論員」嘅「林忌」起勢咁寸，又話佢個建議小學雞，又叫佢捐晒成份糧出嚟。不過，「林忌」出咗名黐開郭永健個「初選」對手、「新民主同盟」咖喱飯（范國威），呢鋪究竟係咖喱飯派打手出嚟打擊對手，定係「林忌」自把自為剷爆「左膠」，就只有佢兩個先知嘞。
身為史上最「短命」區議員嘅郭永健，前日朝早落咗去馬鞍山，同民主黨區議員李永成視察巴士班次，仲話如果自己當選嘅話，會同新界東嘅反對派區議員聯手解決交通問題，「讓公共交通真正以民為本，而非成為牟利工具」喎。
「當選解決唔到係咪自殺？」
「林忌」轉頭喺facebook連出幾個po（帖文）鬧爆郭永健，先嚟一招指桑罵槐：「原來工黨的張超雄以及民主黨的林卓廷都係廢的，所以當選咗兩個立法會議員都無法處理新界東的交通問題，卻要郭永健當選先可以處理。咁你兩位咪辭職退位讓畀郭永健做囉，霸晒全香港立法會工作來做好冇？點樣解決呢？哦，當選就可以解決，真係好有說服力呀！當選咗解決唔到係咪自殺以謝天下人？......中學生選學生會，咁樣政綱都被人問到口啞啞啦小學雞！非牟利工具真係好偉大，不如由『左膠』份糧開始，成份糧非牟利囉好冇？」
「非牟利公交」被嘲資助水客
越講越扯火，「林忌」再出多兩個po，質疑工黨個「非牟利公共交通工具」建議係咪要全港免費坐車，由政府資助水貨客，又話「左膠」要「非牟利」嘅話，可以由自己免費接載開始，「唔使諸多藉口要收十萬一個月先『研究』點樣去做㗎。」對於「左膠」嚟講，有乜嘢工可以月入十餅嘢？都係得一份啫，咪就係碌到入立法會囉！■香港文匯報記者 陳庭佳