■有「熱狗」摷返劉頴匡（右）幫傻根拉票幅相出嚟。 fb圖片本來3月立法會補選啲花生都係質晒喺九龍西嗰邊，之但係自從撐開「港獨」嘅「社區網絡聯盟」發言人劉頴匡話有意出選新界東、同佢舊老闆咖喱飯（范國威）打對台之後，新界東啲花生友卒之唔使缺糧。自稱獲得「青症雙邪」的士梁（梁頌恆）支持嘅劉頴匡，慌死「本民青」啲票未夠穩陣，又喺facecook打咗篇文箍票，講到自己係「本土派」名門正宗咁，俾「熱狗」回帶擺返佢前年幫「城邦派國師」傻根（陳云根）拉票幅相出嚟，而「青症」個「狗頭軍師」林浩基更同的士梁打對台，鬧劉頴匡扮「本土派」喎！
當「民動」的「初選」無到
自從劉頴匡出嚟話想去馬之後，辣着咖喱飯不特止啦，一直話獲得「本民青」支持嘅前學聯常委張秀賢亦都好唔滿意，加上佢擺明當「民主動力」個所謂「初選」無到，睇怕就連工黨主席郭永健都得罪埋。
佢前日喺facecook打咗篇文，話呢個補選議席唔單止「屬於」的士梁或者西瓜琦（梁天琦），因為的士梁係代西瓜琦出戰，而西瓜琦嘅每一票都是憑旺角暴亂嘅「義士」犧牲而換返嚟，所以呢一席係屬於「義士」以至成個「本土派」。
佢話：「我沒辦法坐視這場因為整個『本土派』被DQ（取消議員資格）而產生的補選，變成一場普通的選舉。因此，我認為『本土派』必須參與於今次補選當中，最低限度都可以控制輿論走向，甚至迫使『民主派』正視『本土派』和『旺角抗爭者』的聲音。」言下之意即係「朕即『本土』」啫！
網民鬧兩面三刀
雖然「熱狗」無話去馬玩補選，亦都唔似會去馬，不過黐開「熱狗」嘅「網上三國人物」「趙雲」都睇唔過眼劉頴匡咁講嘢，質疑佢如果覺得新東場補選係「整個『本土派』被DQ而產生」，即係話「本土派」只有「青症雙邪」，「睇嚟Ventus Lau（劉之洋名）已經對『本民靑』的票源流晒口水。」「Marco Wong」直頭扔咗幅劉頴匡幫傻根拉票嘅相上facebook，鬧佢兩面三刀，「佢認同嘅『本土』理念係乜×？」
「狗頭軍師」林浩基睇完幅相擰晒頭，話劉頴匡明明支持「熱狗」套「永續基本法」，仲話的士梁無約佢去BBQ，所以反對人哋做議員，「記憶猶新啊，??家出黎扮『本土派』，係當香港人係弱智定自認自己係白痴（癡）呢？我唔識分鳥（了）。」一度係Cheap禎（游蕙禎）個「Plan B」嘅袁健恩，亦都鬧劉頴匡講法同話西瓜琦食人血饅頭有乜分別喎。
得罪晒幾瓣人，劉頴匡即使入到閘，睇怕連按金都攞唔返！■香港文匯報記者 陳庭佳