■梁金金出文諷刺。 fb截圖在反對派「初選」前夕，有意參加立法會新界東補選嘅學聯前常委張秀賢報稱前晚深夜遇襲，同樣想選新東嘅工黨郭永健、中大學生會前會長劉穎匡都喺facebook出文譴責，但成日俾人話人緣差嘅咖喱飯（范國威）唔知點解反應低調，只係留言話「撐住」就算，繼續喺fb做宣傳。向來鍾意陰謀論嘅反對派，對呢件事都充滿猜測，有人認為係張秀賢自導自演，有人就覺得可能係「初選」對手所為，又有人再調轉諗覺得可能係想藉事件傷咖喱飯，一個「初選」又鬼打鬼又咁多理論，乜佢哋唔攰咩？
「初選」前鬼打鬼 咖喱飯最傷
話說張秀賢噚晚凌晨喺fb出文，話自己前晚11點喺大圍離開餐廳後就俾人襲擊，右手、頭部等受傷，仲入埋院𠻹。事件一出，郭永健同劉穎匡都喺自己fb出文，話「譴責兇徒施襲」，又慰問張秀賢，要求警方盡快做嘢，唯獨咖喱飯就咁喺張秀賢個post留言話「撐住」，完全唔喺自己fb提對手受襲一事。
不過，反對派呢類報稱受襲事件都唔係第一次發生，今次信唔信就真係人人唔同睇法。有人就入咗建制派數，「北區水貨客關注組」召集人梁金金（梁金成）就話︰「『泛民初選』前，候選人張秀賢受襲，冇理由係建制派阻佢出『初選』，又或者幫佢谷票吧？咁唔通係......」明顯係覺得係佢啲對手所為。「Wan Wan」亦話︰「常理推測，建制做機會低，因為佢選票流唔到去建制個（嗰）邊。」
「Ringo Ng」就再調返轉諗，出文話︰「張秀賢街頭遇襲，最『傷』可能係范國威。」似乎覺得件事可能係終極反間計。
有好多人都俾反對派呃過而變得警覺，質疑事件真偽。「Kent Li」就話︰「犯（泛）民狗最叻自編自導自演！」「Michael Lws」亦話︰「又造抽水新聞。」
fb專頁「無神論者的巴別塔」就寸到出面︰「由公佈自己有跟圍標開始，下午先收刀片、半夜再比（俾）人打，呢個舖（鋪）路成朱凱廸第二嘅劇本都真係寫得太完美。」再加上「補選近了」、「世人都兵行險著（着）」等hashtag（標籤）。
佢之後再出多個post問人，「其實你班友知唔知真正買兇係點？」就話之前啲買兇新聞，受害人都係身中多刀，對比張秀賢話俾兩個南亞人「一直望住」，再俾人用遮打，形容好明顯係「苦肉計」喎。
張秀賢似乎都唔忿氣俾人話老作，之後又出post「詳細交代遇襲過程」，話有兩個市民幫佢call白車等，仲話個頭腫咗兩個位，右手唔可以完全屈曲喎。其實反對派都慣咗無限陰謀論㗎啦，講到尾大家都係爭補選個位而互相攻擊啫。 ■香港文匯報記者 甘瑜