■余德丞憑台慶劇《誇世代》跑出。陽光形象夠煞食 俘虜少女心
憑42吋巨胸在台慶劇《誇世代》跑出的余德丞（Dickson），陽光外形加上一副健碩body，殺死唔少少女，而且他更成為「搶手貨」。早前他分別跟麥明詩及劉穎鏇（Tiffiany）傳緋聞，更被封為「港姐收割機」，Dickson對緋聞一笑置之，只因在他心中，是不會找圈中人拍拖，原因好簡單，他不喜歡女友化妝。 採、攝：植毅儀
台慶劇《誇世代》播出以來，除陳豪和森美的「HeHe」情為人津津樂道外，有翻版「彭于晏」之稱的28歲小鮮肉余德丞於劇中半裸晒42吋胸肌而成為網民熱話，Dickson更火速被網民起底。本是家中獨子，家住2千萬的跑馬地豪宅，與天王郭富城做鄰居。曾為香港泳隊代表、熱愛運動的Dickson2014年加入無綫，主持體育及兒童節目，直至去年，被監製陳維冠睇中，有機會演出無綫劇《殭》、《幕後玩家》及《誇世代》。
「因為我好喜歡體育，又想做一些有關體育的事，又想去里約奧運，所以加入TVB做體育主持。入TVB前，在廣告公司工作一年多，也試過在新城做DJ，後來范振鋒介紹我入TVB。父母都是打工，不是大家口中的有錢人，也不是做生意。雖然是家中獨子，但父母一向支持我，讓我做自己喜歡的事，我沒有經濟壓力。入咗TVB 4年，Joe（陳維冠）找我拍劇，以前多是群戲，今次的角色是首次有感情線兼多對白，而且與陳豪、江美儀及關禮傑等人有對手戲。最感激的是監製們願意試用這個半新人。拍攝前的確很緊張，又睡得不好，擔心忘記對白，多謝監製開拍前私下找我與麥明詩一起對戲，現在劇集出街，深深感受到劇集效應，出街時有人叫我角色名Ocean。」訪問當日，很多粉絲都在餐廳等Dickson，更大叫其劇中名字Ocean，人氣比陳豪更勁。
獲秋生教路點化
香港游泳代表隊出身，名校華仁畢業，Dickson結束運動員生涯後，曾當高薪的游泳教練。入劇組後，眼見身邊個個都是好戲之人，他也趁空檔便不斷自我增值，就如前年他特意向黃秋生拜師學戲。
「做演員同做運動員相似的地方就是要捱得苦及有恒心，不同之處是做運動員付出100分，會有80分的收成，但做演員，就付出100分，可能得60分收成。做呢行啲機會係突然間，你唔知幾時來，如果得閒冇嘢做，咁梗係搵啲嘢練吓、充實吓自己啦。去年跟黃秋生學做戲，秋生令我更加了解自己，『點化』了我，叫我做回自己，叫我不要心急，現在回頭想，機會慢慢來都是好事。今次做美儀姐（江美儀）個仔，佢教咗我好多嘢。之前拍《殭》，陸永教我演戲其實是做回生活中的自己，因為當時我成日覺得，一講對白，對手唔知應該點擺。陸永就反問我：『你現在同我傾偈，對手放邊？』一個劇爆起，但又唔代表之後有後續，所以我都有心理準備慢慢做下去。戲路上作多方面的嘗試，雖然啲人話拍古裝好辛苦，但我好想試吓，其實咩都想試吓，因為拍劇嚟講我仲好新，我都想拍青春偶像劇，好似幾好玩又相對冇咁大壓力。」而Dickson主持的新節目《生活100錯》月尾推出，他認為也是不錯的新嘗試。
從沒劈腿不花弗
身為高富帥，余德丞早前先後跟前港姐麥明詩和劉穎鏇傳緋聞，結果被封為「港姐收割機」，他當然例牌否認戀情。問到擇偶條件，他表示女朋友一定要素顏，變相告訴大家，不會選圈中人做女友，也間接告訴大家，之前的緋聞都是煲水新聞。
「我鍾意運動型，同埋我好鍾意食嘢，所以女仔咩都唔食就真係咪搞我。仲有我唔鍾意人化妝，唔鍾意女仔黐假眼睫毛，所以圈中人唔啱我，就算因為工作而化妝都唔得。因為我唔做嘢都唔化妝，私下好『烏Wear』，女仔有內在美就夠。」Dickson又強調自己不花弗，拍拖次數一隻手數晒，從來沒試過一腳踏兩船。後來是因為大家工作忙而分開，現在沒有拍拖。