■齋Sir的對話截圖，指出今次選舉失敗係蟲炎自己嫡系嘅錯，絕對與人無尤。fb截圖反對派嘅「政治明星」、選舉期間已經講明自己唔會處理地區市民申訴嘅蟲炎（姚松炎），在立法會九龍西落敗為反對派陣營投下一顆震撼彈。佢哋當然唔會檢討自己幾咁堅離地咁不得人心啦，而係首先話民協唔幫手，然後就話係因為朱凱廸呢個統籌成個選舉工程嘅豬隊友。不過，唔少睇唔過眼有人賴完呢個賴嗰個嘅人，就將一啲同蟲炎義工對話嘅截圖上載，矛頭直指係蟲炎，話根本就係佢嘅選舉核心有問題。
蟲炎支持者在敗選後不斷推卸責任，話今次落選全部都係其他人嘅錯，好似蟲炎係宇宙唯一真理咁。電台節目主持人陳雲海，就喺選舉後在fb上載咗一張佢3月9日同一名為蟲炎助選的民協義工的ＷhatsApp截圖，圖中只見雲海對個義工講，話佢幫蟲炎助選，「輸又賴你地（哋），勝又唔會多謝你！」
佢喺帖文中話：「結果又比（俾）我言中！」佢仲喺留言度話，對方當時嘅回覆係「義無反顧地去幫」。當然，此帖一出，蟲炎嘅水泥隊即刻出動。「李明子」就質疑：「唔明D（啲）人打落水狗有麥（乜）用？又幫唔到泛民？比（俾）你估中又如何？題（提）出意見才有用嗎（嘛）？」「Johnny Chong」就圖轉移視線：「咁民主黨公民黨工黨嘅助選團呢？死×曬（晒）？」
唔關民協事，咁應該入邊個數？花名「齋Sir」嘅浸大宗教及哲學系高級講師陳士齊亦喺fb上載兩張ＷhatsApp截圖，圖片有蟲炎義工話疑為蟲炎選舉核心嘅Ben Lai，完全不肯做貼地的選舉工作，而如果唔係佢哋自己安排嘅活動，就絕對唔會肯做。
對方仲喺ＷhatsApp舉例話，佢哋幫手安排到喺深水埗街市掛海報，但對方「竟然話冇時間去」，「（落選）我認為姚松炎團隊及其助理需要負上最大責任！」
網民批「連大學選學生會都不如」
「Siu-Chung Wong」對此甚有同感：「事前有聽過佢地（哋）助選團呻的話，根本唔會對教授落敗有任何意外。所謂選戰，連大學選學生會都不如。」不過，有疑為蟲炎嘅支持者「Gwun Kiu Vng」就聲稱，「懷疑中共早早就已經埋潛好多奸細落姚松炎嗰度，伺機行事！」
入唔到民協，有蟲炎支持者就入朱凱廸數囉！當然，選舉工程咁差，佢點都要負責任，但唔通蟲炎同佢嫡系團隊就真係放手俾（畀）朱凱廸亂搞？前街工成員、葵青區議員周偉雄就喺fb一個自己友直播中留言話：「阿廸被人入佢數係幾無辜，只可以怪責的是姚競選辦不與其他政團傾分工及尋求經濟及人力的支援。」
自稱「自由身攝影師」的林健恆也忍不住留言道：「我一早×梗（緊），根本同2016年迪自己選差好遠，2016年係不停落地，而（𠵱）家某D（啲）人射波，就落晒阿迪度......老老實實，係（蟲炎）核心隊太得罪義工，聽過太多義工訴苦......核心團隊真係要自己行出黎（嚟）承擔返唔係老屈迪硬食！」
當然，蟲炎支持者又出嚟賴嘞！「陳嘉文」就話「初選姚唔應該搞，浪費咁多時間搞初選，又嘥錢，大家政黨應該協商只派姚出選......民主黨袁海文，同馮檢基根本唔應該出選。」
明知係自己團隊有錯，點解周圍賴人？唔通係因為自己「親兵」所以包庇？無論點都好，成日掛住「民主」嘅人，一次失敗，即刻現形，證明佢哋先至係霸權囉！ ■香港文匯報記者 陳川