■方國珊叫人「找亮點」，質疑范國威一當選就唔理民生事務。fb截圖選到立法會議員，「工作」嘅優先次序梗係唔同咗。正當立法會班反對派嘈緊「一地兩檢」之際，運輸及房屋局局長陳帆喺14日去咗西貢區，仲同西貢區議員會面。在補選中落敗的西貢區議員方國珊就發咗張陳帆同區議員傾緊偈嘅相，叫人「找亮點」，亮點咪係當選立法會議員嘅范國威（咖喱飯）唔喺度囉！去咗邊？去咗打卡囉！
方國珊發相叫人「找亮點」
話說陳帆當日去咗西貢，其間同西貢區議員會面，「就地區事務交換意見。」方國珊就喺自己fb發咗一張佢同其他區議員同陳帆一齊講緊嘢嘅相，應該就係呢個場合影。佢仲發文話：「選舉後的第一個與運房局陳帆局長會面。議席到手，下一句係？大家找亮點？」
睇真啲，張相影到同樣係西貢區議員范國威個名牌，但席上就冇人，唔通去咗廁所？其實，睇吓伭b就知，原來佢同一時間係去咗赤柱監獄探社民連副主席、喺今年1月因旺角「佔領區」清場刑事藐視法庭而被判入獄4個月15日嘅黃浩銘，仲喺門面影咗張沙龍相。
係嘅，宣傳自己「抗爭」形象就梗係重要過做實事啦。網民「Jayden Keung」就留言揶揄：「議席到手，耍手擰頭。」「Chris Ho Ho」就接住話：「議席到手，咖哩（喱）立即回復本性，好似去咗扮探監呃like同謝票cap水。」「Addie Sam」就嘆道：「咪以為自己真係選左（咗）個出來幫手做野（嘢），改善香港。 還說追求民主？ 就是要永遠都追唔成， 你永遠都選佢。」■香港文匯報記者 陳川