民主？利用得㗎？反對派最鍾意任意擺龍門，一時就需要「初選」去了解民意，一時又覺得個議席係某某人嘅私人財產咁。「瀆誓四丑」之一嘅劉小麗（老千）唔再上訴DQ案，令有關議席補選一觸即發，似乎唔多想選嘅吽A就點名要工黨李卓人做「Plan B」，連其他反對派中人要求要有「純民調」嘅「初選」，唔好欽點，佢都話「未能同意」。真係要幾霸道有幾霸道。
由劉小麗「欽點」李卓人做Plan B開始，個地盤已經霸好咗㗎啦，但喺今年3月立法會補選嘅「初選」環節就俾人狂「屈基」嘅民協，就算內部同馮檢基有分歧，但分歧還分歧，「初選」機會都仲係要爭取㗎嘛，係咪？佢哋前日就同劉小麗見面，講下補選安排咁話。民協就擺明車馬話支持劉小麗出選，但劉小麗唔選就要有淨計民調嘅「初選」咁話，都唔使你做大龍鳳啦，但劉小麗亦都立場堅定，話「未能同意」喎。
對於劉小麗嗰班人可以做到咁霸道，甚至想用「假初選」去內定李卓人出選，「Johnny Sin」反問︰「想問民主何在？」「Lawrence Jacob Wong」就直言民協唔使嘥心機︰「多餘的，『輸打贏要』。如果，『泛民』 有『初選』，多數會選出了『馮檢基』，到時『屈基，強逼（迫）退出』，再由自己屬意的『出選』！又是『本土自決年輕人』！」「Hung Lee」亦批評︰「『泛民』永遠不及建制，因各自為政，並不是為大局，長此下去，選民都會離去。」
高永文未定去馬與否
另一方面，食物及衛生局前局長高永文噚日就俾人問到係咪會參加九龍西補選，佢承認有人游說佢參加，但自己仲未有去唔去馬嘅決定。佢仲話自己一直好鍾意臨床工作，離開政府後舊年8月底已經重新開始有關工作，強調繼續做好臨床工作係佢最重要的原則，未來嘅工作會與醫療體系有較大關係。 ■香港文匯報記者 甘瑜、文森