打住勞工組織牌頭嘅「街工」白頭佬（梁耀忠）諗住解散「勞工組」3個幹事件事，拖咗成個月都未解決，繼被幹事話佢無良僱主、要人做義工後，近日再有5個執委辭職，踢爆白頭佬唔民主，根本就係想解僱3個幹事慳返嚿錢去幫自己「永續參選」。白頭佬噚日終於喺facebook度貼咗自己個聲明出嚟，話就話對5個執委辭職「責無旁貸」，但就一句都冇回應過5個執委嘅大踢爆，繼續聲稱一切都係財赤問題，咁咪當交代咗囉。不過，好多同路人都睇唔過眼，叫佢交代財赤問題到底係唔係問題。3名苦主之一就再爆多句梁耀忠嘅無良語錄，叫大家月尾打簿就知有冇糧出喎。
早前白頭佬話有財赤問題，「街工」旺角「勞工組」3個幹事嘅人工可能「負擔唔到」，但一直都唔肯認炒人，結果俾3個幹事喺勞動節踢爆佢嘅無良語錄。件事拖咗一段時間，都未有解決方法，早幾日就有5個「街工」執委請辭，即陳裕詩、江健成、羅維進、龍子維、朱江瑋，佢哋仲出聲明踢爆，白頭佬本身同佢哋講希望收返「勞工組」開支，去請兩個人協助做選舉工作，到事件鬧大之後，先改口話係因為財赤。
5個執委個聲明仲話，有年輕執委願意共同承擔財赤問題，但佢哋連想睇數簿都唔得，白頭佬仲威脅佢哋如果執委會肯承擔，佢就率先拎返20萬走喎。5人直言︰「令我們懷疑所謂『財赤』，不過是解散『勞工組』的借口，最終只為排除異己。」
呻窮認裁員 冇講咩原因
成件事搞到咁肉酸，白頭佬噚日終於公開刊出聲明，話自己對會內事務達唔到共識「責無旁貸」；對「街工」無法籌得資源維持組織工作，佢就「深感遺憾」；對5個執委請辭，佢就「惋惜」、「尊重」同「感謝過去付出」。除咗呻吓窮同話希望今年內可以穩定資源外，其他咩都冇講過，唯一突破係一直唔肯認自己炒人嘅吽A終於講咗句「可能裁員」。
乜咁樣都算回應咩？「Siu Ming Chan」質問︰「財赤原因冇交代，教市民如何相信？裁員僅限『勞工組』，教同事如何信服？......總辭聲明講出『街工』內部不民主、會內機制失效、執委會成員資訊不平等，各項問題全無回應，睇唔到你梁耀忠有何惋惜？」
「Yolande NG」就關心3個幹事嘅實際問題，一開始就問咗白頭佬6月到底有冇人工、佢哋仲有冇返工，「作為香港選民想了解返！ 因為你們是有立法會議員和區議員的組織，又以勞工權益理念向市民籌款，你們向社會的示範，會對社會造成影響，有需要向大眾解釋！」
「獨派」分子楊繼昌質疑︰「『街工勞工組』用立法會議員開支實報實銷，乜原來這筆錢不用支薪，可以直入『街工』戶口解決財困？願聞其詳！梁議員不想在這裡交代，可以關上門跟icac講。」「Carrie Ching」揶揄︰「個聲明睇落好似咁多執委辭左（咗）職都無咩咁，講左（咗）兩次負上責任，責無旁貸，唔知係（喺）邊度體現到佢負責？仲會唔會討論『勞工組』問題？財務報告會否俾（畀）執委睇？」
「終於蒲頭」 被爆新語錄
3名幹事之一嘅王曉君噚日就分享咗白頭佬個「回應」，揶揄佢「終於蒲頭」，再爆料話「專責小組約談判都約到5月31日最後一日先肯坐低傾。」佢仲話，白頭佬5月31日仲話唔知6月支薪情況，仲理直氣壯話「梗係」月尾打簿至知喎，霸氣程度真係同「有時間返嚟做義工」有得揮。 ■香港文匯報記者 甘瑜