■鄧家彪fb出文寸張超雄，批其大玩政治show，勢必將議案拉到下年，連累一眾打工仔。 fb截圖嫌假期太少，所以多兩日都寧願唔要？呢啲咪就係「泛民邏輯」囉。增加男士侍產假可謂香港準父母嘅期望，但係當勞資雙方達成共識，肯先將侍產假由3日增加到5日嘅時候，反對派議員就衝出嚟阻止件事，係都要成立個法案委員會去審吓先。勞工及福利局局長羅致光噚日就寫網誌，率先向各位「狗年BB」嘅爸爸道歉，因為成立咗個委員會後，最快都要出年農曆新年左右先可以生效，即係呢班爸爸同5日侍產假無緣嘞。唔少網民都對此感到憤怒，但唔係嬲局長，而係嬲堅持要7日侍產假先收貨嘅工黨張超雄，認為要怪就怪佢阻住晒，「根本羅致光不用向那些本來可享有侍產假的爸爸道歉，不是你的問題！」 ■香港文匯報記者 甘瑜
羅致光噚日以《向「狗年BB」爸爸致歉》為題撰寫網誌，話其實侍產假嘅修訂法案好簡單，所以自己本身想說服議員唔好成立法案委員會，令有關修訂可以喺暑假休會前通過，咁一眾準爸爸咪可以早啲享用到更多假期囉。
羅致光料拖至明年新春
雖然都知有班反對派議員係都要7日侍產假先收貨，但羅致光喺上星期三立法會大會發言時，已經講話修訂都可以喺二讀嘅時候表達，唔一定要成立法案委員會講，但𠵱家睇嚟，「成立法案委員會是不能避免了，最快完成審議工作及恢復二讀，都要待立法會10月復會之後。就算順利通過，仍需刊憲，立法會再審議生效日期，亦由於聖誕節及新年立法會休會，相信只能於農曆新年前後，才能生效。我現在只能希望第一位『豬年BB』的爸爸可以多享兩天侍產假。」
羅致光最後都話，政府提交條例修訂，的確要走好多程序，所以都唔可以「賴」議員，但由於簡單修訂閒閒地都要搞半年，所以佢只好先向「狗年BB」嘅爸爸講「對唔住」先。
提出要成立法案委員會嘅張超雄見羅致光咁樣講，就即刻向傳媒批評局長「貓哭老鼠」，仲話雖然成立法案委員會係會延長咗件事，但覺得立法會唔應該「袋住先」，而要為市民「發聲及提出修訂」喎。
不過，市民明顯就唔係張超雄咁睇囉。「Ann Wu」狠批︰「（勞資）雙方都同意，只有你一個就......真的無話可說！新聞報導（道）話有議員堅持成立法案委員會所以先不能生效！根本羅致光不用向那些本來可享有侍產假的爸爸道歉，不是你的問題！」
網民籲爸爸團結踢走加會雄
「John Leung」反問︰「五日都未過，就話要搞七日，過左（咗）五日之後再檢討唔得既（嘅）？」「Chak-tim Ng」亦問︰「袋住先然後繼續爭取，請問『加會雄』有何問題一定要拉倒呢？」
「Simon Ma」怒斥︰「議事是討論，協商，達成！那些所謂議員的字典中從來就沒有遁（循）序漸進這句，一係就有，一係就拉倒！」
「陳曉生」突破盲腸咁話︰「無佢份嘅嘢，話之你！」「Sun Choi Kam Winnie」就勸大家唔好再投畀咁樣嘅政棍︰「連呢樣都拉布！投過票俾（畀）佢既（嘅）爸爸們！快D（啲）問佢攞返D（啲）選票，踢此賤人出局！」
鄧家彪寸抽水政治show
工聯會鄧家彪亦喺facebook出文話︰「局長，唔駛（使）道歉。張超雄一定拉到下年，等埋九龍西李卓人補選嘛，俾（畀）佢地（哋）做政治show。反正，找數嘅係打工仔，唔係佢。」再加上「有邊次唔係臨尾抽水」、「零成本爭取」標籤去寸張超雄。