所謂政治，都不過係利益嘅計算。灣仔大坑選區嘅區議員、「傘兵」楊雪盈，近日想力捧其助理、曾參與「佔領」浸會大學更不斷以偏頗資料唱衰學校的陳樂行上位，包括幫對方喺隔籬嘅維園選區插旗，準備參加明年區議會選舉。不過，反對派除咗社民連有人「一早」已經同「民主動力」報名外，「傘兵」社區組織「維多利亞社區協會」李永財亦係部署緊嗰區參選。有其他「傘兵」就鬧爆楊雪盈，話對方都做過「傘兵」，「唔該你唔好上咗位就恰×啲細地區組織啦，咁多區唔落係要搞人哋個區。」
啱嘅，區議會真正稱得上嘅「自己人」得自己一個，點都要仰人鼻息，想搶多個位都係人之常情，而係人都知每逢選舉，可以搶嘅都係立場相近者嘅票，難怪楊雪盈要捧陳樂行，都揀喺隔籬兼已經有其他反對派中人做緊嘢嘅維園選區。不過，一早「報咗名」嘅社民連當然唔妥，而同楊雪盈同樣係「傘兵」、話自己喺區內已經營咗一段時間嘅李永財就更加唔妥。
「東區本土關注組」就發帖，話每日出入維園區，「除咗見到維多利亞社區協會李永財有做過幾次地區工作外，港語學嘅陳樂行就真係無乜點見過。不過如果呢件事（陳樂行選維園區）係真，空降落區而又搶人成果去參選，呢招的確係好卑鄙嘅行為！」
「神駒」爆陳樂行有插旗無落區
「無敵神駒」仇思達前兩晚亦喺網台踢爆陳樂行去維園插旗但無落過區，「第二日楊雪盈即刻搵啲爛頭卒去維園派糉（糭），可惜依然唔見陳樂行蹤影。」
曾代表「東九龍關注組」參加2015年區選嘅鄭國俊亦發帖狠爆陳樂行：「偽『本土』陳樂行係一個為咗上位不擇手段嘅政棍，……佢哋（『維多利亞社區協會』）嘅社區主任大半年前已經喺維園舉辦活動，之後keep住有喺維園選區搞活動擺街站，連個人宣傳品都出埋。你老×陳樂行竟然插隻腳落去想收割人哋嘅工作成果，大佬你唔好咁×賤啦。……呢啲咁自私咁老『飯民』心態嘅×街如果上咗位做到議員，真係會同你爭取民主爭取公義咩？慳啲啦。」
佢仲質問楊雪盈：「你都做過『傘兵』體驗過無議員資源下做區嘅辛酸，唔該你唔好上咗位就恰×啲細地區組織啦，咁多區唔落係要搞人哋個區。」
「Ivan Mak」也道：「楊雪盈地區工作，雖然比其他『泛民』中人出色，在未了解該選區有沒有社區工作主任進行地區工作的情況之下，找助理進行地區工作，就算『維多利亞社區協會』成員或李永財社區主任未必與楊雪盈議員相熟，在未經同意之下都不應該進行地區工作！」
網民踢爆「愈鬧愈開心」
不過，沙田社區網絡社區主任黃浩鋒就好「豁達」：「畀啲自信嘛，做區邊駛（使）理呢啲網上嘢呀 ~」
「Lee Yik Kiu」就踢爆：「聽講楊（雪盈）辦有共識，『有網民』愈鬧，陳樂行愈開心，鬧得佢嚟就唔得閒搞第二個，所以換個account都慳返。」■香港文匯報記者 陳川