有網民根據反對派議員嘅投票情況，依個人得分及政黨得分，製作出「港奸指數」。 fb圖片
反對派議員成日唔開會、唔投票，俾人鬧咗好多次依然闊佬懶理。有網民近日就列表製圖，更新反對派議員出賣市民嘅統計表，再根據佢哋嘅投票情況去計「港奸指數」。結果，「專業議政」個梁繼昌就因為10次出賣反對派支持者而攞到最高分，被封為「最壞港奸」，同屬「專業議政」嘅葉建源同李國麟就排喺第二。早前先因為呢樣嘢同反對派議員區諾軒開火嘅facebook專頁「無神論者的巴別塔」勸大家唔好再含淚投票，再補刀話︰「最悲哀嘅係，直到呢一刻為止，『飯民』所有議員都完全無就呢啲指控作出任何回應同反省，會就繼續唔開，有人質疑就掉番（返）轉頭恐嚇市民。」 ■香港文匯報記者 甘瑜
反對派議員個個月袋九萬幾人工都可以唔開會咁荒謬，「巴別塔」都將佢哋嘅開會情況當笑料咁話「最Update飯民港奸指數上線啦！」引用網民「Stephen Wong」特登整理嘅「飯民出賣市民統計表」，去檢視班人喺啲咩重要議案缺席投票、棄權，甚至幫政府。
14重要議案 8次缺席鬆章
結果顯示，14個重要議案入面，有8次就因為反對派班人缺席而令議案通過，包括財政預算案、沙中線追加撥款、加入亞投行等等。
梁繼昌李國麟葉建源放頭
講完集體責任，都要講吓個人表現。「Stephen Wong」計埋每個人因為投票（1分）、棄權（1分）、幫政府（2分）而攞到咩分數，再整埋棒型圖，等大家一目了然。
結果顯示，成日俾人認為係「疑似建制」嘅醫學界議員陳沛然攞11分，但自稱為「非建制派」嘅議員，包括梁繼昌就有13分，李國麟同葉建源都係11分，一堆民主黨、公民黨議員更緊隨其後，質疑佢哋根本就唔應該話自己係「非建制派」。
「巴別塔」仲寸之前強搶保安局女EO（行政主任）手機嘅民主黨許智峯話︰「點解許智峯咁緊張自己『議會私隱』比（俾）政府收集、甚至不惜以身試法搶人手機？睇完呢個表你會自然明白。」冇嘅，都係喺重要議案4次缺席，前後7次「出賣支持者」啫。
范國威區諾軒埋牙已開齋
有啲人好低分㗎，好似「新民主同盟」嘅咖喱飯（范國威）同無黨派嘅區諾軒，仲有曾經坐過喺議會嘅社民連長毛（梁國雄）同「自決派」蟲炎（姚松炎），但「巴別塔」就溫提大家，咖喱飯同區諾軒當選數月，「竟然已開齋搶分，更係令人齒冷」，而長毛同蟲炎就一早俾人DQ咗，可謂係「非不為也，實不能也」啊。
唔開會唔投票甚至對反對派陣營倒戈相向都唔係最惡，最惡係俾人批評時仲鬧返人轉頭，講緊嘅咪就係之前恐嚇「巴別塔」嘅區諾軒囉。「巴別塔」明顯依然耿耿於懷︰「最悲哀嘅係，直到呢一刻為止，『飯民』所有議員都完全無就呢啲指控作出任何回應同反省，會就繼續唔開，有人質疑就掉番（返）轉頭恐嚇市民。」
「巴別塔」仲歡迎大家自由轉載呢啲資料，「撕破『飯民』口講『守護香港』，實際偷懶賣港嘅虛假面具！」
「Man Yu Hang」揶揄呢班「飯民」︰「關鍵一席，關心搵食。」「Sum Cheng」就轉載話︰「（時評人）劉細良教落，政治人物最重要唔係睇他講咩野（嘢），是睇他做咩野（嘢）。」