邊個咁大整蠱，「成功爭取」路面變得凹凸不平？公民黨兩個區議員，包括梨木樹東嘅陳琬琛，同梨木樹西嘅黃家華聯合出張海報，話「成功爭取梨樹路地面凹凸不平」喎。海報一出，當然俾人恥笑文盲啦！有網民仲爆料，話條路係路政署主動嚟維修嘅，寸陳琬琛喺區內一直都做唔到嘢，所以一有啲咩改善咗嘅咪撲出嚟抽水領汀o，真係低質議員咁話。
根據該幅網民上載fb嘅圖片顯示，嗰幅大字標着陳琬琛同黃家華兩個名嘅海報，標題係「成功爭取梨樹路地面凹凸不平」，內文則話接到居民投訴，不滿梨樹路路面凹凸不平。佢哋向有關部門反映後，政府視察並確定凹凸，並已經喺本月8日重鋪云云，標題明顯與內文不符啦！
陳琬琛賴黃家華寫錯
陳琬琛喺回應傳媒查詢時就話係手民之誤，並將責任推落拍檔黃家華身上，話該幅海報主要由黃家華嘅議員辦事處負責喎。佢哋仲會盡快收回同重新列印。
海報一出，眾皆恥笑。「Ricky Chow」道：「即係原本係平路，但爭取改為凹凸不平？」「Kevin Wong」和應道；「因為只為突顯『成功爭取』！其實要修平路面，都要去到爭取，難道真係咁悲哀......」「Victor Wong」建議：「不如寫『成功爭取路見不平』仲有睇頭。」「Kevin Wong」揶揄：「但唔會拔刀相助。」
喺恥笑嘅同時，有疑為當區居民更發文踢爆話陳琬琛抽水領功。「Panada Chan」話：「路政署自動來維修，又話自己成功爭取，領功。」「Crystal Yeung」也道：「我平時行路，見到路面不平，我都會打去1823，路政署很快搵人修補回覆，......乜嘢都抽水，呢啲咁嘅（事）普通市民都可以做，唔係你區議員的面子，唔好睇（喺）自己面上貼金......」
唔少人都乘機大吐苦水。「Joey Chu Kwok Hau」揶揄：「（區內）成日冇廁所水，會唔會都是成功爭取？」「Keung Ng」就話：「最白痴（癡）就係周圍放石櫈（凳），好阻街。」
「Susana Lore」就爆料，話自己見到「有2個年青（輕）小伙子入到大堂，對管理員大聲說我係義工幫陳琬琛派傳單嘅（我還以為黑社會入侵梨木樹）就掂行掂過一直行。管理員有禮地叫他們先登記，那2個小伙子很沒有禮貌的大聲說：你搵陳琬琛講啦！登（頓）時覺得陳琬琛係乜水呀，只不過是個得把聲一事無成嘅區區小議員，D（啲）義工真冇禮貌，唔想做就咪做囉！」
義工惡形惡相似黑幫
不過，個帖冇片冇圖，有網民就唔多信，話冇圖冇真相喎。不過，「Gato BiBi Siz」就留言話唔意外：「佢一直當自己係梨木樹山寨王囉！之前講過新年嗰陣佢連房署派嚟嗰隻醒獅行去邊都要干涉。」
「Yuk Man Jovi Ching」就話：「呢兩件粉腸（陳琬琛同黃家華）就係我嘅選區嘅，左邊果（嗰）個（陳琬琛）之前差唔多日日開咪煩住成村人，但做唔到野（嘢）俾街坊插到×街。」「Yuk Man Jovi Ching」嘆道：「如果呢度有實質嘅競爭嘅話，佢早兩屆就收咗皮啦！」 ■香港文匯報記者 陳川