「街工」立法會議員梁耀忠（白頭忠）近日被踢爆拒任小組委員會主席。他昨日在網台接受民主黨前主席劉慧卿（卿姐）訪問時解釋，自己拒絕擔任該小組委員會的主席，是因為想爭取發言。唔少網民鬧佢係廢人，叫佢早唞。不過，有人就話喺嗰次會議，成個反對派只得白頭忠一個人開會，並質問啲黃絲點解唔鬧其實最應該鬧嘅、當日缺席會議嘅其他反對派議員，擺明就係其他反對派中人想踢白頭忠出局，霸埋佢個位。
話說立法會根據《建造業議會條例》及《肺塵埃沉着病及間皮瘤（補償）條例》提出的擬議決議案成立的小組委員會早幾日舉行首次會議。由資歷較深而且「在席」嘅梁耀忠按慣例在選出委員會主席前主持會議，第一項議程就係先選主席。
當時，提出成立委員會嘅工黨議員張超雄未到，公民黨議員郭家麒亦未見蹤影，結果民建聯嘅黃定光建議由梁耀忠任主席，梁耀忠就耍手擰頭。糾纏一輪，張超雄先到，但最後都同意由工聯會嘅何啟明做咗。
拒揸莊想發言 啞口食黃連
呢個決定當然俾「敵我分明」嘅黃絲鬧爆，但佢哋嘅矛頭就淨係指向白頭忠，冇鬧遲到兼且同意有關決定嘅張超雄，同埋直情no show嘅郭家麒。被鬧得極堅嘅白頭忠昨日就喺接受卿姐訪問時解釋，稱自己拒絕擔任該小組委員會的主席，是因為想爭取發言。
他解釋，自己曾任人力事務委員會主席，但過程中只有委員不斷發言，自己只能主持而未能發表意見，「我真係好想就（是次會議）議題講嘢！」
卿姐就批評梁耀忠指，議員具有責任擔任委員會主席，且當時會議中只有白頭忠、黃定光和勞聯議員潘兆平共三人，即使梁出任主席也絕對有時間發言，「主席其實更有權。」
製造無能形象 黃絲全中伏
唔少黃絲就喺網度鬧爆白頭忠不負責任。「單璟暉」就話：「即刻讓番（返）個位出嚟啦，仲留喺立法會做乜×呀？又淆底又無料又多藉口！」
「Hana On」亦稱：「做區議員咪算囉，乜都唔爭取唔表態唔發聲，選乜春立法會！」
不過，「Stephen Wong」就幫白頭忠「辯護」：「你知唔知上次個會係得佢一個『泛民』議員準時開會？但無人鬧遲到及缺席嘅『泛民』議員。......同埋成件事《蘋果》故意避重就輕，唔話俾（畀）讀者知郭家麒唔到，張超雄遲到，呢單嘢明顯係×街『泛民』聯手煮白頭忠。」 ■香港文匯報記者 鄭治祖