■「神駒」又追「小麗老千」數。 仇思達fb截圖由「小麗老千」劉小麗被裁定喪失立法會議員資格而觸發嘅立法會九龍西補選，將會喺11月25日舉行，即係仲有5個月時間畀啲有意參選者熱身同落場爭凳仔。有傳「小麗老千」今個星期就會公佈會「積極考慮」出選，不過佢筆舊數到??家都仲未還得晒，就係前年選舉時承諾會捐一半人工畀社福組織同「家務義工隊」嘞，俾一路狙擊佢嘅「無敵神駒」仇思達「溫提」佢唔好借頭借路走數！
選舉管理委員會噚日公佈，計劃喺11月25日舉行立法會九龍西補選。選管會發言人話，喺決定補選日期時，要考慮所有客觀因素，包括需時招募同培訓額外選舉人員、票站場地商借情況、選舉物資嘅採購同運送，仲有恰當運用公帑原則等，佢哋會喺完成提名程序所需嘅安排後，盡快喺憲報刊登有關補選日期同提名期嘅公告。
暗催反對派埋嚟抬轎
「小麗老千」被視為反對派喺今次補選中嘅「Plan A」，佢回覆傳媒時就口口聲聲話補選日期比預期早，反映反對派要盡早啟動選舉工程喎，咪即係叫班自己友唔好諗佢又會再被DQ住，同佢抬咗轎先算？佢又話反對派要盡快就「Plan B」人選凝聚共識，希望下次「民主動力」會議可以傾掂數咁話。
比「小麗老千」經驗老到得多、但俾唔少黨派「捧」佢做「Plan B」嘅工黨李卓人，亦都同佢統一口徑，話目前最重要係團結支持「Plan A」攞返個議席。
民協企硬要搞「初選」
但民協唔係咁諗，據悉喺「民主動力」入面一直堅持要用「初選」去決定邊個係「Plan B」。民協主席施德來更加話，會喺下個月中嘅「民主動力」會議上重申立場，仲不排除喺會前個別接觸其他政黨，游說佢哋轉軚𠻹。上次「初選」搞到滿城風雨，主角之一嘅民協「facebook管理員」馮檢基就話唔諗補選住喎，唔知係咪校啱時間先引爆退黨參選呢個炸彈呢？
一單還一單。「小麗老千」喺前年選舉嗰陣，承諾會捐一半人工畀社福組織同「家務義工隊」，仲喺選舉工程尾聲用呢樣嘢做主打，最後畀佢碌到一席返嚟。不過，財到光棍手，佢個「捐一半人工」嘅承諾一直都未能兌現，雖然佢話前年10月半份老底已經捐咗畀3個組織，但一直都無單無據，被質疑係捐白頭片，10月打後嗰啲更加係影都無！仇思達噚日就「溫提」佢：「我淨係想知劉小麗『前議員』，幾時先肯兌現選舉承諾，捐返『在任』期間（2016年10月至2017年6月）嘅一半人工出嚟？」
建制派方面又點呢？民建聯主席李慧琼話，雖然佢哋一直認為九龍西同新界東補選應該合併進行，但會尊重選管會安排，而建制派將會更緊密協調人選，最重要係能夠團結不同建設力量。 ■香港文匯報記者 陳庭佳