■譚香文寸主流反對派，話選民啲票唔係鎖喺�哋個夾萬度。譚香文fb截圖反對派就立法會九龍西補選明則「協調」、暗則互片，幾個大黨為咗力保工黨李卓人（阿人）做到人稱「小麗老千」嘅劉小麗個「Plan B」，竟然諗出畀「小麗老千」嫁入工黨呢條唔知乜橋。噚日有傳媒就話，工黨已經批准「小麗老千」個「小麗民主教室」加入做佢哋嘅團體成員，換言之佢可以孭住工黨牌頭出選，否則都可以根據「被DQ者及其組織成員優先」呢個原則，由李卓人自動做「Plan B」，連「初選」都慳返咁話。「民主派」喎，推個「Plan B」出嚟都唔使問其他人喎，就連過氣「民主女神」譚香文都睇唔過眼，質疑反對派支持者係咪老奉要投畀個欽點出嚟嘅「Plan B」：「你估啲票鎖喺你夾萬度咩？」
噚日有傳媒引述消息報道，工黨執委會日前通過「小麗民主教室」加入做團體成員，換言之「小麗老千」會以團體成員代表身份「嫁入去」工黨，一旦佢喺補選中被DQ，都可以根據早前定落嘅「被DQ者及其組織成員優先」嘅原則，由李卓人呢個「非民選 Plan B」以「遞補機制」頂上。嘩，又唔係一人一票選舉產生「Plan B」，又擁抱「遞補」，反對派玩回力鏢真係玩到出神入化！
報道又話，條橋係有反對派中人諗嘅，喺政治聯繫方面孑然一身嘅「小麗老千」亦都唔抗拒，但有工黨中人驚死咁做會令人覺得工黨為議席而不擇手段，反對派亦都有人覺得一直堅持「初選」嘅民協會唔服，而反對者亦都會以「小麗老千」被DQ嗰刻唔係工黨成員而拗餐飽。
譚香文質疑當選票係私產
一早離開咗反對派核心嘅過氣「民主女神」譚香文，就喺facebook強調選舉從來都係鋪鋪清，即使邊個當選之後被DQ，都唔代表「非建制」選民要無條件支持佢，「學『本土派』當年鬧『泛民』嗰句，你估啲票鎖喺你夾萬度咩？」
阿「女神」仲話，比例代表制之下，邊個拎住一成左右選票就可以當選，其餘三四成「非建制」支持者都唔一定咁支持嗰個人嘅政治立場，有啲甚至係唔認同「宣誓玩嘢」，「𠵱家出咗事，你連一個『初選』程序都唔搞，連『Plan B』都要玩欽點，你當『非建制』選民真係欠咗你班人咩？」
老馮批藉口無時間「初選」
一直堅持「初選」、但對自己係咪退黨出選態度曖昧嘅民協「facebook管理員」馮檢基（老馮），喺回覆報章查詢時亦都反駁「小麗老千」等人以唔夠時間等原因唔想搞「初選」：「信民主嘅人，唔會搵唔夠時間做藉口。」 ■香港文匯報記者 陳庭佳
