■王岸然寸李卓人講清潔工人時薪市價好似講到發現新大陸咁。 王岸然頻道fb截圖或者工黨李卓人自己都估唔到，自己都成60歲人，仲可以俾人捧做「小麗老千」個「Plan B」，一個唔覺意取代「小麗老千」去選仲要贏埋嘅話，更加可以逗多年零兩年人工。不過，佢贏到先講啦！好似佢日前喺深水埗落區時，就着到好光鮮咁同清潔阿姐接觸，講到清潔工時薪時仲要好似發現新大陸咁，喂，阿哥，你係咪做工會㗎？有網友仲挖返海麗邨罷工事件嚟講，提到佢同時所屬嘅職工盟疑似將籌款落格，咦，海麗邨都喺九龍西喎！
着名牌衫落區被寸爆
李卓人日前落區時，着咗件Patchwork恤衫，同清潔阿姐件工作服呈強烈對比，而佢喺facebook個post（帖文）就更加係政治或者選舉宣傳嘅負面教材，好似佢提到「深水埗外判清潔工時薪$35，多最低工資得嗰5毫子」，就俾本名黃覺岸嘅評論員「岸伯」王岸然寸到應：「吓......你今日忽然先知道麼？新界東啲清潔工時薪高好多的麽？」岸伯仲留意到李卓人件恤衫係名牌出品，係個清潔阿姐成個星期人工咁滯。
唔少網友亦都加多一腳。「Maggie Lau」翻職工盟舊賬：「又係李卓人......上次海麗邨罷工，（職工盟涉嫌）私吞了十多萬捐款。」「LR Wong」話當年係李卓人爭取最低工資，??家又懶理。「Shing-hong Yip」就話：「做選舉工程都做好啲啦！」
呢個時候「人粉」亦都陸續進場，不過就好似越幫越忙。「Acke Hullit」罵街咁款：「成個post係搵嘢嚟講，搵嘢嚟鬧，人哋有話唔知道新界情況咩？着咩衫又關咩事呢？不知所謂。」
預先利申自己係工會中人嘅「蕭強」就話，李卓人一直有爭取工人權益，奈何能力所限，自己唔會苛責，「如有『扔磚勇士』在此，我不為人（李卓人）申辯，否則問問自己又如何」，即係寸岸伯同班花生友得把口啦，但俾「李欣樺」一句搞掂：「如果有『義士』仲要佢出嚟認，而唔係保護佢？」
「Mark Chiu」就幫李卓人着靚衫解圍，話件衫喺美國啲factory outlet（特賣場）10蚊美金就買到，不過即係暗示李卓人有錢又有假飛過去美國「濕平」啫！ ■香港文匯報記者 陳庭佳
