■網民開帖恥笑長毛敵我不分，當咗自己友係益友咁鬧。 fb截圖社民連長毛（梁國雄）自從冇得做議員後，積極從事同網民鬧交嘅工作，但唔知係咪因為嘈得太多，搞到佢郁下就覺得自己「被挑戰」。有網民前日喺長毛facebook貼咗一堆政客圖片嘅拼接，長毛嗰張相亦由鬧人變成滿面笑容，明明個網民係想講中央「專制」，但疑心生暗鬼嘅長毛就覺得人哋係話緊佢變臉，即刻當對方係「神駒」仇思達班「益友」咁鬧，搞到個網民都只好講返句「毛哥，自己人」去辨識身份。呢排成日追擊佢嘅網民「JoJo Wu」就截圖恥笑︰「懷疑毛哥患上被害妄想症，敵我不分，連自己嘅支持者都當咗係『益友』以為人哋又迫害佢，搞到人哋要出Post（文）澄清！好×戇×！」
粉絲「創作」踩親條尾
「主公，別開槍，自己人。」以為係玩遊戲先聽到啫，點知原來喺長毛fb都見到。網民「Sam Leung」前日喺長毛fb貼咗啲「藝術創作」出嚟，張張相啲政客都俾人封口、換笑面、染紅等等，個主題係「內地官員之選」，暗示緊中央「專制」。明明開正長毛嗰範，但長毛就以為人哋揶揄緊自己，即刻當對方係「益友」，再九唔搭八咁攻擊假想敵話︰「叫教主（黃毓民）找數，坐14日先，我在2015年5月抗議林鄭，判監7日，上訴在今年7月3日審結，教主2014年7日在立法會擲水杯被判入獄14日，到今日上訴庭尚未開庭，走數乎？」
莫名其妙俾長毛質問，「Sam Leung」都算轉數快，即刻回覆話「我不支持神駒」、「我反對教主」。反而係長毛轉唔過嚟，傻吓傻吓咁問人「講什麼」。「Sam Leung」再回覆︰「是我Sam Leung，不是神駒。」你估長毛真係記得支持者係邊個咩？之後唔覆咪當冇質錯過人囉。
神駒抽水寸盲忠護主
咁精彩嘅花生，追擊開長毛嘅「JoJo Wu」即刻截圖派街坊，笑長毛「懷疑患上被害妄想症」，寸佢敵我不分，「以為人哋又迫害佢」咁話。唔少網民都加入恥笑行列。「Dai Ching」話︰「其實佢已經走火入魔。」「Jeremy Lui」揶揄長毛呢種世界與我為敵嘅心態︰「全部網民喺妦握仇ㄚY益友，草木皆兵。」「Eric Lam」就寸「Sam Leung」︰「人哋都唔識你，自己友？」
熱鬧到咁，「神駒」仇思達都現身留言︰「長毛賊啲支持者都特別×，俾主子××仲要當佢『自己人』，戇××！」
長毛雖然唔再應自己人，但就喺「JoJo Wu」度留言繼續同網民嗌交話︰「搵教主及孽畜神駒出嚟喇，一眾×頭皮，搵唔搵到呀......」「JoJo Wu」秒回︰「神駒咪係（喺）樓上出現咗，你搵唔到？」「Patrick Wong」揶揄︰「毛毛酒醒未？」係囉，明明已經正職同網民嗌交，可唔可以睇清楚啲先開波啊？■香港文匯報記者 甘瑜