港台節目《城市論壇》經常就社會時事熱話去做討論，但近年換咗蘇敬恆做主持後，似乎就成日幫反對派「助攻」。自由黨深水埗區議員李梓敬噚日喺《城市論壇》度討論同性婚姻問題時，就直斥蘇敬恆喺台下發言環節揀晒啲支持同性婚姻嘅人發言，遲遲都唔畀捍衛傳統家庭價值嘅人講嘢，質疑佢做法有問題。兩人由節目中段到節目完咗都爭辯到火花四濺，唔少網民都留言撐李梓敬，批評蘇敬恆「一向都咁唔中立」。
捍衛傳統市民 舉極手冇人理
李梓敬話，雖然自己日前話會去《城市論壇》時，已經好多網民叫佢唔好去，話蘇敬恆唔中立，但佢認為自己作為民意代表，都應該去發下聲先啱。點知去到台下發言環節，主持人果然連續揀咗六七個支持同性婚姻嘅人發言，一班捍衛傳統家庭價值嘅人，就舉極手都冇人理。
李梓敬話自己當時已經同蘇敬恆打咗眼色，蘇敬恆話之後會畀另一邊發言，但結果都係再過多一兩個人先有機會，「佢隔咗咁耐先揀，會令電視機前嘅觀眾以為社會一面倒都支持呢樣嘢（同性婚姻），但民調結果其實已經話咗俾（畀）我哋知唔係。」
李梓敬直斥其非 遭無禮對待
眼見部分支持者因為一直冇機會而放棄舉手，李梓敬喺節目中途就直指蘇敬恆安排不當，蘇敬恆就叫佢自己返去睇片喎，李梓敬就話︰「我覺得作為主持人，無論嘉賓講啲咩，都應該保持冷靜......佢用咁具攻擊性嘅身體語言或口吻去對待台上嘉賓，係有唔適當嘅地方。」
就蘇敬恆聲稱自己冇可能預先知台下觀眾係咩立場，李梓敬亦反駁︰「呢個係冇可能嘅，大家都知道坐喺邊度、舉咩標語，大家嘅立場係好清晰嘅。」
雖然唔少市民已經開始話要杯葛港台，但李梓敬就主張大家應該「寸土不讓」，因為港台係公營嘅，由納稅人畀錢去營運，如果唔出聲，等於搭台畀反對派表演，「唔好灰心，爭取去出席，爭取台下發言，我就唔信佢可以block（封鎖）得晒我哋。」
唔少網民都留言力撐李梓敬，批評蘇敬恆偏頗，「James Wong」就更進一步咁話︰「投訴佢！踢走城市論壇垃圾主持！」 ■香港文匯報記者 甘瑜
