■行年四十有一嘅「小麗老千」，嗌咪籌旗中氣十足。 fb圖片今年反對派七一遊行人數係有史以嚟最少，警方公佈得大約9,800人，跌破一萬。反對派組織年年都借呢場遊行嚟搵水腳，成個維園、成條軒尼詩道都係佢哋啲香油箱，不過隨住越嚟越多組織出嚟搵食，唔同名目嘅香油箱亦都隨之增加，之但係善信越嚟越少，點算好呢？惟有好似「中箭」（「香港眾志」）阿河童（黃之鋒）同「小麗老千」（劉小麗）咁爭食囉！話說佢兩個當日各不相讓，喺港鐵站出口鬥疊聲叫人埋去入錢，又嘈又肉酸！有花生友就質疑，遊行人數明明見新低，但有啲組織嘅香油錢不跌反升，可能係有人借呢個機會將「某啲錢」洗返白佢喎。■香港文匯報記者 陳庭佳
講返當日唔同組織嘅「派彩」先。唔計跨黨派而籌到50幾萬蚊嘅「守護公義基金」，第一名係「中箭」，籌到53萬蚊，喺遊行人數創新低之下不跌反升，比舊年多成十皮嘢；第二名係活躍成員喺倉仲多過上街嘅社民連，籌到46.3萬蚊，但比舊年少咗一成；第三名係「小麗老千」嘅「小麗民主教室」，籌到27.6萬蚊，唔知已經表明有意參加立法會九龍西補選嘅吽A會唔會乖乖哋申報埋呢筆捐款呢？
傳統反對派嘅香油錢就全線下跌，民主黨籌到12萬蚊，少5萬蚊；公民黨籌到22.3萬蚊，少大約3.7萬蚊；工黨籌到8.5萬蚊，少4.3萬蚊。主辦單位「民陣」就籌到廿皮，竟然比舊年多咗兩皮幾。
小麗疊聲王KO河童
不過，「中箭」呢個「吸金（血）王」之名真係得來不易㗎。有網民就影到，當日河童喺老銅港鐵站出口同「小麗老千」大鬥法，一人一支咪各佔馬路左右，大家鬥大聲想冚過對方，最後個結果都幾出人意表，二十出頭嘅河童明顯中氣唔夠，嗌咗兩句「支持我哋嘅工作」就要回氣，之後更加hea住嚟嗌，相反四十有一嘅「小麗老千」越嗌越醒神，或者同佢嗌嘅其中一句有關：「但我哋真係無錢！」俾個大你兩轉嘅中女咁樣KO，河童真係要做多啲運動練氣，打少陣機！
有花生友就留意到，今年遊行人數史上最少，但有啲組織嘅香油錢不跌反升。「Wong Joe」假設有萬五人參與遊行，如果「中箭」、社民連、「小麗老千」一共籌到125萬蚊，連埋民主黨、公民黨等傳統反對派應該都有兩球嘢，「即係遊行人士每人都捐咗百幾二百蚊，我又覺得唔太make sense（符合常識），因為唔係每一個遊行的人會捐錢。咁，呢班人吹出嚟嘅總數，冇人會質疑？」「Yt Wong」就認為成場都係大龍鳳：「借遊行假裝籌旗！所以次次報大數！實際將『黑金』漂白......」
人均捐逾兩百反邏輯
「何少麗」戥民主黨陰公豬：「漢奸李（民主黨創黨主席李柱銘）都唔畀面？只得12萬，千億駙馬（指李柱銘個仔李祖詒）掉塊骨頭畀自己友都肥過『中箭』啦，原來剩餘友情價只得12萬。」「Vincent Ma」就叫善信如果真係咁疏爽，不如捐畀啲慈善機構，「至少可以去到受苦的人手中，不會白白送到一班政客的戶口中自肥！」
反對派組織大街大巷擺香油箱搵水腳，都唔係無法無天㗎。
根據《簡易程序治罪條例》第四條，為慈善以外用途喺公眾地方進行嘅籌款活動，需要有民政事務局局長發出嘅野i證，否則可處罰款500元或監禁3個月，而許可證申請就要喺籌款活動日期起計最少4個星期前交畀民政事務總署。