正所謂「禍不單行」，街工自從有3個「勞工組」人員俾靈魂人物阿白頭忠（梁耀忠）「炒」咗之後，就一直諸事不順，之後仲發生咗退黨潮，就連白頭忠口中嘅「接班人」、葵青區議員黃潤達都懷疑頂佢老人家唔順，日前退黨另謀出路。不過，白頭忠喺日前回應黃潤達退黨一事時，竟非常「豁達」咁話「無咩意見」、「無咩傷心」，輕輕帶過，好似唔關佢事咁，仲否認自己講過後年立法會選舉會幫對方抬轎，真係用完即棄。有人更加覺得白頭忠逐個迫走後生仔，都係想為自己永續參選鋪平條路啫！
稱師徒決裂唔傷心
街工區議會議席本身已經唔多，今屆只係得葵青區議會有5席，仲要退吓一個退吓又一個，??家得返白頭忠同梁志成兩個老人家相依為命。不過，白頭忠竟然連一啲「唔制呀」嘅感覺都無，日前回應個「入室弟子」退黨時，只係淡淡然咁話「無咩意見」、「無咩傷心」、「無辦法㗎」，人情原來真係可以好似紙咁薄。
搬龍門改口拒抬轎
或者有人會覺得白頭忠有番咁上下年紀，看破世事，先會講出以上呢啲「脫俗」言論，但講到議席嘅時候，佢就現實到無得再現實。
早前，佢接受民主黨前主席劉慧卿訪問時，明明話過同黃潤達「有共識」，喺後年立法會選舉，佢自己會喺新界西街工條隊排第二，幫排第一嘅對方抬轎。但係，佢日前又忽然轉口風，話當日嘅講法係指「2016年」嘅立法會選舉安排，而唔係後年嘅選舉安排喎。
唔少網民認為白頭忠有意永續參選，所以先將後生仔逐個迫走。「Thomas So」就鬧佢生人霸死地，更質疑佢嘅能力：「佢霸住個位後生無得上好自然走人，做阿頭唔上進hea住做邊有人認同啊！（後生仔）有汗出無糧出，自己個個月就搵十幾萬。」
「黃活志」就話：「白頭佬一早就想達（黃潤達）走，達走咗自己就可以永續參選。」
白頭忠咁對後生仔，苦主之一、前街工「勞工組」成員王曉君更加睇到眼火爆：「回應阿達（黃潤達）退會一事，唔係咩感謝多年付出、極度遺憾之類，竟然係無咩傷心，同埋澄清卿姐節目入面佢其實唔係講2020（年選舉）會抬轎。」佢仲嬲到「問候」埋前老闆全家，鬧佢「仆×冚×鏟」。
「杜山雄」就話白頭忠係無情嘅偽君子：「牠（他）對任何身邊的同行者，永遠就是利用到盡，離開者不願被牠（他）利用時，牠（他）會冷酷無情的態度一句不說。」「Brian Ng」 更加揚言：「若白頭（忠）出來選開街站，我會擺兩個紙扎（紮）公仔響佢街站，然後撒溪錢。」 ■香港文匯報記者 鄭治祖