■陳恒鑌踢爆譚凱邦收珀客母公司錢又無申報。fb截圖馬灣居民近排一直爭取來往中環嘅渡輪唔好減班次，運輸署早兩日就話營運商仲未交資料，現階段唔會處理申請。不過，件事未完㗎，睇落好出力幫馬灣居民爭取嘅當區區議員、「新民主同盟」譚凱邦，就被踢爆佢檔環團「環保觸覺」曾經收取來自渡輪營運商個母公司嘅捐款，仲要無主動申報，不過佢死雞撐飯蓋，話因為自己喺「環保觸覺」無出糧，所以就唔使申報呢段關係喎。有居民曾經激到跳海爭取，不過話時話，阿譚議員，畀票你嘅居民同畀錢你檔環團嘅「金主」跌咗落海，你救邊個？
辯稱無出糧「免申報」
現時馬灣對外交通主要依賴珀麗灣客運（珀客）經營嘅6條居民巴士線同兩條渡輪航線，而珀客嘅母公司就係珀麗灣嘅發展商。珀客早前申請削減來往中環嘅渡輪班次，譚凱邦梗係要刷吓存在感先啦，仲計劃喺嚟緊星期日搞個「千人集會」反對𠻹。
不過，由譚凱邦幫馬灣居民同營運商爭取，似乎差咁啲說服力喎。佢個荃灣區議會同事、民建聯立法會議員陳恒鑌日前就喺facebook出po（帖文）大玩踢爆，指自己曾經喺區議會提過譚凱邦要申報利益，點知對方話旗下嘅「環保觸覺」係有收珀客嘅母公司錢，但係佢本人只係「環保觸覺」嘅「義務總幹事」，無收錢，所以就唔使申報喎。
陳恒鑌寸爆譚凱邦走灰色地帶：「無收錢就唔使申報？董事會成員只要唔收錢就唔使申報？某會主席只要義務就唔使申報？」
被陳恒鑌踢爆改圖抹黑
俾人篤到應，譚凱邦當然嬲豬啦，嚟一招轉移視線話陳恒鑌改圖抹黑佢，係無恥同小學雞行為，又賣口乖讚馬灣居民好有智慧，「不會被民×聯的政治抹黑影響」喎。
陳恒鑌個facebook事後被譚凱邦啲人洗版攻擊，不過都有啲公道評論。「袁文健」就話：「都話咗只要拆穿『犯民』嘅衰嘢，『犯民』與其支持者就會以『文革式』圍攻。」「Peehong Lee」寸譚凱邦借環保之名，萬事反對政府發展收地起公屋，隨時係谷高樓價嘅幫兇！ ■香港文匯報記者 鄭治祖
