■拍攝時，G.E.M.近距離接觸多種動物。香港文匯報訊 (記者 植植) 鄧紫棋（G.E.M.）為慶祝出道十周年，將在今年連推出三張EP專輯答謝歌迷，首支主打國語歌《倒數》昨日面世。《倒數》講述在人生倒數過程中、有限的時間裡，有無限種愛的可能，教人珍惜時間及身邊的愛。新歌曲詞由 G.E.M. 包辦，音樂大師 Lupo Groinig 操刀製作，MV找來台灣鬼才導演Birdy執導，並遠赴內蒙古取景。
G.E.M. 在MV故事中孤身駕車到內蒙古流浪，期間遇見一對情侶，於是她幻想這對情侶偷了她的車去旅行，並代入與男主角拍拖。在過程中發現車尾藏着倒數中的炸彈，同時寓意情侶間的矛盾及問題也隨時爆發。而故事最後一幕，G.E.M. 在車尾箱試圖拆彈，至於最終有否爆炸，則是開放式結局。
黃騰浩冧功了得
繼2015年的《於是》後，G.E.M.的MV一直未有出現男主角，今次她與台灣型男黃騰浩上演多場談情戲碼，如拖手調情、荒原野餐、浪漫看星等，又在「蒙古包」裡舉杯談心，原來黃騰浩在鏡頭外也非常懂得施展冧功，G.E.M.說：「我哋第一場戲其實係嘈交戲，第一次見對方就要鬧交，不過我哋對戲期間加入好多即興對白同動作，其中一場戲要拍我哋好開心，佢為咗氹我笑，自己設計咗個橋段喺凳上跌落嚟，我見到自然反應就係笑咗出嚟，我覺得我哋嘅火花係幾好睇。」
今次是G.E.M.首次到內蒙古的郊區區域，故在拍攝時不時有牛羊做「小配角」攝鏡：「第一次見到咁多牛牛羊羊喺我身邊經過，可以近距離接觸到啲動物，成個感覺好唔同，好靚。不過今次冇時間周圍觀光，喺內蒙古呢三日拍MV嘅旅程入面，見到好多好靚嘅大自然風景，算係寓工作於娛樂。」
不過當大隊離開內蒙時卻發生小車禍，當晚G.E.M.原定打算趕飛機抵北京工作，但航班因暴雨關係而被取消，大隊唯有改經陸路出發：「我哋當日係揸十個鐘車去，但當時能見度好低，比較危險，我哋㗎車有一下撞到前面㗎車。雖然冇大礙，但係我原本喺座位度瞓緊覺，都突然被拋起咗，跌咗落座位與座位條巷仔度，都幾驚險。」