■洪寶華批評民主黨「讓實習生充當佈景板來營造黨獲年輕人支持的假象」。民主青年fb圖片你估叫民主黨就真係好民主咩？少年你太年輕了。民主黨個青年組織民主青年嘅主席洪寶華，前日宣佈出走鴿黨（民主黨），批評鴿黨行「大佬文化」，話「非我族類」在黨內「寸步難行」，又大爆鴿黨假借實習計劃，目的在於用人海戰術扮到有好多年輕人撐鴿黨。有網民就狠批鴿黨係「偽民主黨」，仲讚洪寶華「退黨保平安」𠻹。
搵實習生撐場 扮有青年支持
洪寶華日前發出聲明，指民主青年一直向外宣稱「獨立運作」，但原來民青常委會通過嘅項目，係會俾鴿黨中委會同財委會推翻結果，又指「非我族類」在黨內「寸步難行」，直言「即是外界一直形容的『大佬文化』」。佢又話自己對鴿黨已經完全失望，「不再值得留戀」，所以先至早走早着，退出鴿黨同民主青年。
洪寶華又提到，每年民青均會為鴿黨舉辦實習計劃，踢爆話「民主黨只需要民青每年定時定候做出一個實習計劃」，仲大爆鴿黨用人海戰術充撐場面，「讓實習生充當佈景板來營造黨獲年輕人支持的假象。」佢又話每當民青想進一步完善實習計劃時，鴿黨就會拎份黨內守則去限制民青運作，反問「這樣民主青年還有用嗎？」
見到鴿黨一味用「大佬文化」迫退年輕一代，一眾網民紛紛留言批評。
「Ka Lok Shum」批評鴿黨行「威權主義」：「香港民主黨根本就是垃圾，假民主真極權！」「Yee Chung」就話班老鴿唔讓路：「建制派做到後生一代接班， 反而民主黨就做咗幾十年都唔肯退落嚟， 後生仔接班無期！」
「Popo Ku Simon」認同退黨決定︰「清醒都好過唔清醒。」「Akiyuki Wong」就覺得洪寶華都有責任：「偽民主黨從來都咁衰格，只是閣下找錯門口啫，少見多怪。」近年反對派政黨分裂情況都好常見，「Daniel Chan」就講咗個最常見嘅回應話︰「之後民主黨又會話佢係鬼。」
要員出走 胡志偉竟稱唔知情
咁呢個震撼彈，鴿黨點拆？鴿黨主席胡志偉回應傳媒時就話自己唔掌握情況。
鴿黨自己個facebook就隻字不提今次嘅人事變動，而民主青年個fb都只係得啱啱個實習計劃嘅相，碌多幾吓已經係舊年實習計劃嘅相，主要都係據稱用嚟扮有年輕人支持嘅相，真係幾反映到洪寶華講嘅嘢喎。 ■香港文匯報記者 何西