香港文匯報訊（記者 甘瑜）嚟緊11月個立法會九龍西補選嘅位，點解一定要係「自決派」劉小麗或者佢欽點嘅「Plan B」李卓人？唔止俾佢哋持續「屈基」嘅馮檢基唔甘心，啲激進「本土派」都唔係好甘心。反對派時評人黃世澤前日就出咗篇文，話如果由劉小麗或李卓人出選，建制就肯定贏硬，所以要搵脫離咗「青年新政」嘅九龍城區議員鄺葆賢出選，又或者得到「青政」Cheap禎（游蕙禎）支持嘅人，先會有機會贏喎。唔少網民都覺得呢個講法簡直比「小麗老千」個「關鍵一席」更加離地，直言︰「出有『青政』背景的人肯定輸到九個一皮。」
回帶全民退保龍門任搬
黃世澤喺篇文度話，劉小麗唔靚女都「唔緊要」，「更大問題係，你條友喺全民退保問題上龍門任搬，好多『本土派』或者『右派』叫你『小麗老母』呢個尊號，你估係石頭爆出嚟。」佢仲鬧埋李卓人一樣食相難睇，認為覺得要搵鄺葆賢或者前九龍城區議員任國棟先可以選到。佢仲放晒狠話咁講︰「依（𠵱）家一早就出嚟鬧爆劉小麗同羅冠聰呢啲白痴，我唔會等到輸咗至馬後炮，我十分之肯定，『泛民』呢啲選舉工程，唔輸係無天理，甚至今次會輸得更×街。」
佢講得出呢啲嘢，就預咗又會俾人話佢係鬼㗎啦。「Angus Yu」狠批︰「長篇大論，講到尾，原來係叫『泛民』讓路比鄺醫生選。」佢繼續話，「本土派」一直俾人睇唔起，就係因為有黃世澤呢啲人，「成班人毫無建樹，除咗識得鬧『泛民』同埋佗衰家之外，咁多年來都一事無成。一面睇唔起『泛民』，一面又希望『泛民』將啲政治資產送俾佢哋，根本就係一班政壇寄生蟲。」
跟手就有班人鬧爆黃世澤之流。「Lam Hong」話︰「出有『青政』背景的人肯定輸到九個一皮。」「Stephen So」質疑︰「我都唔明佢咁吹奏阿禎有乜謂（除咗證明自己×到喊外）。」「Anson Tang」狠批︰「佢似乎忘記左（咗）上次補選情況，讓路比（畀）佢那類『本土』出，勢必會令非建制多於一隊。」「Nick Stranger」揶揄︰「咁阿靚女醫生係（喺）退保問題上又做過啲咩？小麗啲票係多過油雞架（㗎）！」
Cheap禎被譏死亡之吻
其實大家嘈到咁激烈都冇乜意思，事實上係好多反對派支持者自己都覺得「以上皆非」。
「Ks Law」話︰「小麗唔得，但鄺醫生都係仍然唔得：知名度唔夠。」「Kin Cheong Wong」就好勉強咁話︰「任國棟應該ok……掛（啩）……鄺醫生係ok嘅，不過離開咗黃埔，選民未必好熟悉佢；而且，之前有梁天琦嘅教訓，『泛民』應該唔想製造另一個『本土派』明星。另外，叫游蕙禎endorse（支持），咪即係死亡之吻。」
唔少人都開始自暴自棄咁玩提名，「Cheng Wai Him」建議︰「阿基（馮檢基）出山打啦。」「James Wong」就話︰「我懷疑要出奇招，搵杜汶澤選啦……」咁又係，咁認真做咩，等反對派分裂完先算啦。