所謂講就天下無敵，身為石湖墟區議員嘅民主黨新界東立法會議員林卓廷，喺選舉時用水貨問題攻擊對手，聲稱自己當選就咩都搞掂，結果係點個個街坊都可以話你知。昨日，佢喺fb話同警方和食環署代表一齊巡視水貨黑點，話要求有關部門增派人手加強巡邏及檢控。不過，唔少當區居民就話佢淨係識做騷，自稱努力但問題越嚟越嚴重，真係信你一成，「×都變形」咁話。
參選踩對手 當選仲嚴重
水貨係一個複雜問題，難搞係意料中事，但喺選舉時就識得攻擊對手處理得唔好，猛話自己當選後就可以解決問題，結果唔單止做唔到，問題仲越嚟越嚴重𠻹！
噚日，林卓廷喺fb上載咗張打卡相，話自己喺中秋臨近時，聯同警方和食環署代表一齊巡視上水石墟街嘅水貨黑點，並要求相關部門在假期和節日期間增派人手加強巡邏及檢控，仲話會繼續要求食環署和警方打擊水貨咁喎。
不過，張相影得幾靚都好，街坊唔係咁易呃嘅！網民「Tab Anson」就留言踢爆：「嗰日我都路經此地，（林卓廷）淨係識企係（喺）度扮議事影幾張做show，除水貨外，我都覺得你企系（喺）度阻×住我行呀！」「保密」亦話：「議員帶啲警察去行街做show比（畀）市民睇啫！有心做就突擊檢查啦！重要影哂（晒）相放上嚟！唔好當人白痴低能好無！」
「Kc Fung」批評：「你算吧啦林生！講到今日水貨客問題完全無改善過，仲信你嗰個都ON（戇）×××！」「Alan Law」揶揄道：「成日話做野（嘢），乜野（嘢）都冇變過……同太監洞房有咩分別？」
「Hang Pn」則狠批：「由選贏左（咗）果（嗰）年計，巡左（咗）幾多年？咪又係日日一樣。不如下次高佬（林卓廷）響新康街表演跳求雨舞吖，落大雨會少左（咗）水貨佬架（㗎）。」
林粉賴建制 反被網民圍
林粉「崔倩雅」就試圖幫林卓廷推卸責任：「鬼叫北區俾建制挽（玩）曬（晒）咩！」「顧家暉」即刻反駁：「石湖墟喺（係）你老細（闆）林生負責㗎喎，原來民主派自己選區做唔好喺（係）建制派嘅錯？……宜（𠵱）家個區民主黨林生話事，你喺（係）唔喺（係）本末倒置啊？你咁想獻世（建制）派做，得啊，你未（咪）開口同你老細（闆）林生講咯，睇佢肯唔肯！」
「壽喜」亦試圖為林卓廷辯護：「其實林先（生）好努力做。」「顧家暉」亦唔放過佢：「好努力做場show，辛苦曬（晒）！fans有冇得去後台送下（吓）花咁話？」「Alan Law」質問：「佢做左（咗）咩呀？ 做一D（啲）無結果既（嘅）野（嘢），係浪費大家時間同選票。……水客越黎（嚟）越多，有咩用。」 ■香港文匯報記者 陳川