為咗明年區議會選舉，個個都做嘢，但反對派似乎將心機擺喺攻擊對手上，而唔係做實事囉！話說兩位西貢區議員，民建聯嘅莊元苳同工聯會嘅簡兆祺，一直跟進領展將軍澳尚德廣場迫遷超市嘅問題，仲喺日前去尚德廣場內絕食抗議，終令領展口頭承諾會喺本月12日設立臨時超市。不過，「將軍澳民生關注組」就四圍話呢個問題係自己跟先個喎，建制派係「突然絕食」。莊元苳在反駁嘅同時發帖證明自己一直有跟進呢件事，摑返佢哋一巴。
赴尚德抗議獲領展承諾
話說莊元苳同簡兆祺8月31日喺尚德廣場內絕食，抗議領展迫遷一間超市及3間診所。經過10小時的絕食抗議後，領展有高層口頭承諾莊元苳話會喺本月12日起設立臨時超市，直至新超市營業。
唔知屬於反對派嘅「將關組」係咪葡萄，話佢哋喺8月28號已經「抗爭」爭取保留尚德廣場超市，但「建制派31號早上突然絕食」，又質疑佢哋「聲稱成功爭取9月12日開設臨時超市，但領展發通告只（指）臨時超市於明年1月才開業」云云。
公開細節證已跟進多時
本來各有各做，結果係有益於街坊嘅，其實邊個做都冇所謂啦！不過，「將關組」就係唔抵得人哋做到自己做唔到，所以攻擊嘅對象並唔係領展，反而係服務市民嘅區議員。
莊元苳為正視聽，就喺自己fb發帖，介紹成個行動，首先自己同簡兆祺都係喺28日就呢件事發起聯署行動，並喺同日下午同領展管理層開會反映街坊意見。
第二日同第三日，即係8月29日同30日，佢哋喺收集街坊簽名一日半之後，即係喺30日下午再同領展開會，結果獲告之有關舖位已全數租給一間大公司，所以佢哋先喺31日絕食。有圖有真相，莊元苳貼晒相，證明佢哋絕非「突然絕食」。
喺接受傳媒訪問時，莊元苳話領展確係口頭承諾咗會安排臨時位置為居民提供一般超市嘅主要日常生活用品，以方便居民，而領展張貼嘅通告中亦已經清楚說明，並批評「將關組」嘅指控不負責任。
佢哋會繼續要求領展履行承諾。同時會繼續爭取保留3間診所。■香港文匯報記者 陳川