■小麗老千偷刪網頁政綱，不過一早俾網民CAP咗圖啦。 fb圖片被揭偷改政綱 網民斥原則當垃圾狂走數仲想選
反對派把口無論講到幾偉大，其實做所有嘢都係為咗自己嘅政治利益啫！近日，表明正「積極考慮參選」嘅「瀆誓四丑」之一的小麗老千（劉小麗），就俾人發現鬼祟地刪咗自己政綱嘅「自決」字眼，仲賴係自己個助理「更新網頁」所致喎。唔少網民揶揄佢，為咗議員呢份薪高糧準嘅職位，所謂原則、理念、立場以至尊嚴都只不過係垃圾嚟嘅，好似上次當選時話捐一半人工成立九龍西義工隊、爭取「免供退保」，都係為咗爭取選票啫，結果當選後完全冇兌現過。呢種咁嘅人，有咩資格做議員？ ■香港文匯報記者 陳川
由小麗老千創辦嘅團體「小麗民主教室」，其政綱以「政治上公民自強自決」為題，其中提到「香港人有政治自決的權利，有權決定自己的政治地位」、「香港人固然應該政治自決，......一個從中共獨立出來卻又不民主的香港，又和十九年來的特區政府小圈子統治，有何分別？」
語言偽術猛兜 話選完再改
根據《大公報》報道，大批相關的、講到「政治自決」的內容，已經被人鬼祟刪除。小麗老千喺接受傳媒查詢時，就話只係助理「更新網頁」啫，更稱自己最終倘出選，就一定會再「更新網頁」，向選民闡述佢新嘅政綱云云。
雖然原本政綱中講到明係話「香港人有『政治自決』的權利」，但小麗老千竟然可以擘大眼講大話，話自己講嘅「自決」係「生活上有自主、社會自強」，同香港要有高度自治，鞏固「一國兩制」，自己從沒提倡「主權自決」或「公投」喎。
煽「獨」違法言行一早出晒街
「自決」係「生活上有自主、社會自強」？點兜都冇用啦！小麗老千喺2016年參選立法會期間，《蘋果日報》已經大字標題話《70後劉小麗撐前途自決 支持市民自決香港前途》；2016年7月31日，佢聯同「香港眾志」同朱凱廸，就選舉主任宣佈「香港民族黨」成員陳浩天立法會選舉的提名無效發表聯合聲明，其中就話此舉係「以一紙聲明刪去港人自決未來的選項之一--『香港獨立』。」
聲明仲話到明，「我們的共同政治綱領是『民主自決』。民主自決的政治意義本就是要超越所有對人民的限制，包括是基本法的限制，以民主的方式讓人民決定自身的命運和香港前途。......若香港人要決定未來，自主命運和前途選項，我們不得不從『基本法是唯一基礎』的思想框架中掙脫，香港的命運應由香港人決定，而非基本法，更非北京或香港政府。......我們定必捍衛『香港獨立』作為港人自決前途的選項。」
2016年10月立法會議員宣誓儀式時，小麗老千就喺宣誓時自行加插「共同開創民主自決之路」等，事後更自以為聰明咁喺自己發帖同接受傳媒訪問時，講到明「特區政府的整個政制，表面上有合法性，其實一點都無！整個基本法，整個政制連特首，都未經過港人民意授權，所以根本非法」，「今後我將會在議會內外，與香港人同行，努力對抗各種體制要求的虛偽，......共同開創民主自決之路。」
白紙黑字，小麗老千唔係想唔認係嘛！不過，為咗議員呢份工，佢真係厚住面皮唔認都唔出奇。有網民就講得好：「佢為咗有得選，認你做老豆都得呀！」