■兩民間團體往選管會示威。 香港文匯報記者殷翔 攝劉昔批蟲泰簽確認書 今自己簽示範「為私利棄承諾」
為咗入閘，原則算係咩？劉小麗日前報名參選，就簽署咗確認書，即係表明參選人須擁護香港基本法第一條、第十二條及第一百五十九（4）條。有網民就回帶，話2016年立法會選舉，「熱血公民」主席鄭松泰（蟲泰）簽署確認書後，劉小麗就話拒絕簽署確認書係「不容妥協的原則問題」、「政治人物的操守，反映他在重要關頭會否為一己私利而背棄選舉承諾」，並批評佢為咗立法會議員嗰九萬六人工，連誠信都可以唔要，正正係佢自己口中嘅「為一己私利而背棄選舉承諾」嘅政客。■香港文匯報記者 陳川
「香港眾志」常委周庭因為鼓吹「自決」而被DQ，同樣係鼓吹「自決」嘅劉小麗，為咗參加呢次補選，就鬼鬼祟祟刪咗自己之前嘅選舉政綱同埋講「獨」嘅文章，內容包括「香港人有政治自決的權利，有權決定自己的政治地位、擁有自主的政府、立法議會，以及獨立的司法體系」；「香港市民應真正參與到政治前途的命運自決之中，由他們自己透過民主討論和參與，決定自己的命運」等等。
既然連非常嚴肅、白紙黑字嘅政綱都可以隨便刪，其他嘢就更加唔使講啦。曾經反對確認書嘅劉小麗，喺日前報名時就「身體很誠實」咁簽署咗確認書，話要畀選民「最大嘅保障」喎。
「狙擊政棍小隊」fb專頁就發帖回帶返劉小麗兩年前寫咗篇文叫《政治原則不可違 〈確認書〉不能簽！》。
該專頁話：「當自己企喺安全位置時就聲大大講原則，到燒到自己就轉成『予選民最大保障』。哦哦，兩年前俾你鬧嘅候選人就唔可以『保障選民』？寬己嚴人，這就是政客。」
「信口開河 何以取信於民？」
劉小麗當時寫到話絕不會簽確認書，仲大言不慚話身為政治人物，「政治人物的操守，反映他在重要關頭會否為一己私利而背棄選舉承諾」、「他的可信和可靠程度，是市民選擇一個代議士的重要根據」。不過，佢既刪「自決」，又走去簽署咗確認書，豈不正正係佢自己口中嘅「為一己私利而背棄選舉承諾」？
網民「Andy Kin」就揶揄：「九萬六喎，賣乜乜都得喇嘛......何況係尊嚴？」「蘭花系」的馬健賢亦話：「從政者誠信最重要，所謂『民無信不立』，曱甴犯忌，順（信）口開河，何以取信於民？相同的，『老千』16年打着『民主自決』的旗號當選，現在轉投工黨，放棄『民主自決』，一樣失信於民，背棄了支持者。」
小麗曾就「確認書」表態
■《確認書》是無中生有的政治審查
■拒絕簽署《確認書》，是不容妥協的原則問題
■作為政治人物，更重要的是，在大是大非的問題上堅守原則，不會砌辭掩飾自己的軟弱
■政治人物的操守，反映他（她）在重要關頭會否為一己私利而背棄選舉承諾，他（她）的可信和可靠程度，是市民選擇一個代議士的重要根據
■我絕對不會簽署《確認書》，更呼籲所有非建制候選人集體抵制《確認書》