老馮速報名反擊「民主」惡勢力 網民不齒「大佬」獨裁稱挺馮
由聲稱「考慮」參選到正式報名，民協前主席老馮（馮檢基）就俾以「亂港四人幫」之一嘅黎智英，同其他親反對派傳媒網台瘋狂攻擊，唔單止大搞考古，更不斷人身攻擊佢，而叫得最客氣嗰句係「老而不死是為賊」。唔想網上攻擊繼續，老馮就正式報名參選，希望用選舉條例制止呢啲侮辱。估唔到呢吓都幾靈，《蘋果日報》就即刻刪除咗話老馮反口再反口條片。唔少網民都不齒各反對派黨媒口講民主實質獨裁，表明要撐硬老馮咁話。 ■香港文匯報記者 陳川
原本講話針對嘅係你呃人嘅老馮，喺補選提名期開始第一日就報名參選。佢當時解釋，自己被反對派不斷攻擊，如果自己報名參選，其他人如果有失實或弄虛作假嘅言論，就會受到選舉法例嘅約束，所以要以提早報名嚟阻止有人繼續發佈失實言論，仲承諾一旦劉小麗成功入閘，佢就會喺提名期結束前退選。
不過，反對派黨媒《蘋果》即時新聞唔提呢樣嘢，見報篇文更大大隻字話老馮報名參選係喺劉小麗背後插刀，仲整咗條片，話老馮「反口反口再反口報名」。
質疑飯民借DQ助阿人「復辟」
「無敵神駒」仇思達當時就發帖，「『泛民』、《蘋果》和D100卻刻意隱瞞，誤導讀者，使市民誤以為馮檢基要搶奪劉小麗的參選優先權。『泛民』用心惡毒，搶先攻擊馮檢基，以確保劉小麗被DQ之後，李卓人能順利繼位。如此封建式欽點，還算『民主派』嗎？」
老馮昨日亦喺fb發帖，叫網民分享：「我已登記侯（候）選人，會受選舉及舞弊條例規管。若有網台，傳媒評論員言論，有失實聲明，抹黑，造謠，企圖扭曲狀況，影響選舉，請代我記下及傳我（pm）！如有證據，報警處理！我想（相）信大家會為香港的民主和民主選舉，共同建立平台，建立民主文化！反對文革批鬥式選舉行為！......讓更多人為公平民主選舉盡分力！」
聲明一出，見效神速。《蘋果》話老馮「反口反口再反口報名」即刻唔見咗。中文大學「獨」講師劉正就喺fb發帖揶揄：「拿（嗱），馮檢基一參選，爛果日報即刻要刪片，果（嗰）啲講乜×你（老馮）報唔報（名），都阻唔倒人批評你嘅濕× kol可以×皮。仲有呀，亂×咁話人收錢，隨時惹官非上身𠻹呀，我係你而（𠵱）家開始就唔好再亂×噏啦！」
網民挖「毒果」臭史號召挺馮
不過，自稱「新垣結衣老公（之一？）」嘅「益友」陳興旺就話老馮可能天真咗啲，「佢實在太低估以黎智英為首既（嘅）『民主』惡勢力，......2012年立法會換屆選舉，黎智英喺蘋果日報撰文《自由的分水嶺》，直指當時參選人黃毓民同人民力量『成了中方打擊泛民的政治打手』（直接引述），直接影響人民力量選舉。事後向ICAC舉報，竟然不了了知（之）。」
佢話：「黎智英指住一位報館記者，『我實會搵人搞×你』、『我影×咗你嘅相』，該報館事後亦都有報警處理，但又係乜事都無！」
喺今年以獨立身份參加上次立法會九龍西補選嘅蔡東洲，就喺fb上載自己同老馮嘅合照，仲狠批「毒果為左（咗）抹黑不是肥佬黎欽點的潛在對手，無所不用其極，發佈失實聲明達關鍵程度，此乃刑事罪行，時窮節乃現（見），毒果可恥！......假若劉小麗被DQ，我現在公開呼籲311補選支持我的2794位九龍西選民在1125補選全投馮檢基」。